Jayasimhakalpadruma 3.p28.6

3.p28.6

akāle brahmaṇa bodho devyāstvayi kṛtaḥ purā | ahamapyāśvine ṣaṣṭhyāṃ sāyāhne bodhayāmyataḥ |' tato bilvatarumāmantrayet | 'merumandarakailāsahimavacchikhare girau | jātaḥ śrīphalavṛkṣastvamambikāyāḥ sadā priya | śrīśailaśikhare jātaḥ śrīphala śrīniketana | netavyo'si mayā vṛkṣa pūjyo durgāsvarūpataḥ |' iti | evaṃ devīmadhivāsya svagṛhamāgacchediti | itiṣaṣṭhīkṛtyam | tataḥ paradine saptamyāṃ mūlayuktāyāṃ kevalāyāṃ vā pūrvadināmantritabilvatarusamīpaṃ gatvā punastaṃ saṃpūjya gṛhaṃ praveśayet | taduktaṃ hemādrau laiṅge-'mūlābhāve tu saptamyā kevalāyāṃ praveśayet | yugmābhyāṃ navabilvasya phalābhyāṃ śākhikāṃ tathā | tathaiva pratimāṃ devyāḥ snātvā'bhyukṣya praveśayet |' atra copavāsapūjādāvaudayikī saptamī grāhyā na tu yugmavākyātpūrvā | 'yugādyā varṣavṛddhiśca saptamī pārvatīpriyā | rakherudayamīkṣante na tatra tithiyugmatā |' iti kṛtyatattvārṇavodāhṛtavacanāt | 'bhagavatyāḥ praveśādivisargāntāśca yāḥ kriyāḥ | tithāvudayagāminyā sarvāstāḥ kārayedbudhaḥ |' iti tithitattve nandikeśvarapurāṇavacanācca | durgābhaktitaraṅgiṇyāmapyevam | tatrāpi ghaṭikāto nyūnatve parā na kāryā| 'vratopavāsaniyame ghaṭikaikāpi yā bhavet |' iti devalokteḥ iti gauḍāḥ|dākṣiṇātyāstu-yugmavākyātpūrvāṃ kurvanti | patrikāpūjā ca pūrvāhna eva kāryā na tu mūlānurodhānmadhyāhnādāviti kṛtyatatvārṇave uktam | jyotiṣe'pi-'pūrvāhne navapatrikā śubhakarī saṃgrāmaghorāvahā sāyāhne'vadhabandhanādikalhaṃ sarvakṣataṃ sarvadā |