Jayasimhakalpadruma 4.p1.2

4.p1.2

vṛṣānkarṣāpayedgobhiruktipratyuktivādibhiḥ | tato'parāhnasamaye pūrvasyāṃ diśi bhārata | mārgapālīṃ prabadhnīyāttuṅge stambhe'tha pādape | kuśakāśamayīṃ divyāṃ lambakairbahubhirvṛtām | dīkṣayitvā gajāvaśvāmsāyamasyāstale nayet | gāvo vṛṣāḥ samahiṣā maṇḍitā ghaṇṭikotkaṭāḥ | kṛte home dvijendrastu badhnīyānmārgapālikām | durgārmantreṇa homastu ghṛtenāṣṭottaraṃ śatam | namaskāraṃ tataḥ kuryānmantreṇānena suvrata | mārgapāli namaste'stu sarvalokasukhaprade | vidheyaiḥ putradārādyaiḥ punarehi vratasya me | nīrājanaṃ ca tatraiva kāryaṃ rāṣṭrajayapradam | mārgapālītale cetthaṃ yānti gāvo gajā vṛṣāḥ | rājāno rājaputrāśca brāhmaṇāḥ śūdrajātayaḥ | mārgapālīṃ samullaṅghya nīrujaḥ syuḥ sukhānvitāḥ | yo yādṛśena bhāvena tiṣṭhatyasyāṃ yudhiṣṭhira | harṣadainyādirūpeṇa tasya varṣaṃ prayāti hi | rudite roditi varṣaṃ hṛṣṭo varṣaṃ prahṛṣyati | bhuktau bhoktā bhavedvarṣaṃ svasthaḥ svastho bhaviṣyati | tasmātprahṛṣṭaistuṣṭaistu kartavyā kaumudī naraiḥ | vaiṣṇavī dānavī ceyaṃ tithiḥ paitrī yudhiṣṭhira|'iti| athāsyā nirṇayaḥ-iyaṃ balipūjane gopūjanādau ca pūrvaviddhā grāhyā| tathā ca bṛhadyamaḥ-'śrāvaṇī durganavamī dūrvā caiva hutāśanī | pūrvaviddhaiva kartavyā śivarātrirbalerdinam |' iti | 'pratipaddarśayoge pūjanaṃ tu gavāṃ matam | paraviddheṣu yaḥ kuryātputradāradhanakṣayaḥ | yā kuhūḥ pratipanmiśrā tatra gāḥ pūjayennṛpa | pūjane trīṇi vardhante prajā gāvo mahīpatiḥ |' iti devalavacanācca | mādhavo'pi-' balyutsavaṃ ca pūrvedyurupavāsavadācaret |' iti |