Jayasimhakalpadruma 4.p112.1

4.p112.1

śaktitaḥ | kapile sarvadevānāṃ pūjanīyāsi rohiṇī | sarvatīrthamayī yasmādataḥ śāntiṃ prayaccha me | yā lakṣmīḥ sarvadevānāṃ yā ca deveṣvavasthitā | dhenurūpeṇa sā devī mama śāntiṃ prayacchatu | dehasthā yā ca rudrāṇāṃ śaṃkarasya ca yā priyā | dhenurūpeṇa sā devī mama pāpaṃ vyapohatu | viṣṇorvakṣasi yā lakṣmīḥ svāhā caiva vibhāvasoḥ | candrārkānalaśaktiryā dhenurūpā'stu sā śriye | caturmukhasya yā lakṣmīryā lakṣmīrdhanadasya ca | lakṣmīryā lokapālānāṃ sā dhenurvaradāstu me | sudhā tvaṃ pitṛmukhyānāṃ svāhā yajñabhujāmapi | vaṣaṭ yā procyate loke sā dhenustuṣṭidā'stu me | gāvo me cāgrataḥ santu gāvo me santu pṛṣṭhataḥ | gāvo me hṛdaye santu gavāṃ madhye vasāmyaham |' gopūjanamantraḥ | 'gāvaḥ spṛṣṭvā namaskṛtya yo vai kuryātpradakṣiṇām | pradakṣiṇīkṛtā tena saptadvīpā vasuṃdharā | namaste kapile devi sarvapāpapraṇāśini | saṃsārārṇavamagnaṃ māṃ gomātastrātumarhasi |' godānamantraḥ | 'hiraṇyagarbhagarbhasthaṃ hema bījaṃ vibhāvasoḥ | anantapuṇyaphaladamataḥ śāntiṃ prayaccha me | raktaṃ vastrayugaṃ yasmādādityasya ca vallabham | pradānāttasya me sūrya ataḥ śāntiṃ prayaccha me | suvarṇaṃ vastrayugmaṃ ca paridhānaṃ ca kārayet | etaiḥ prakāraiḥ saṃyuktāṃ dadyāddhenuṃ dvijātaye | bhānuṃ sadākṣiṇaṃ dadyānmantreṇānena yatnataḥ | bhāskaro vidhito jāto dravyastho bhāskaraḥ svayam | bhāskarasya pradātā ca tena vai bhāskaro mama |' dānamantraḥ | 'bhāskaraḥ pratigṛhṇāti bhāskaro vai dadāti ca | bhāskarastārako dvābhyāṃ bhāskarāya namo namaḥ |' pratigrahamantraḥ |