Jayasimhakalpadruma 4.p48

4.p48

stu te| yena kāmena bho deva pūjitaścomayā saha | vrataṃ saṃpūrṇatāṃ yātu tvatprasādājjagadguro | iti stutvā mahādevaṃ praṇipatya punaḥ punaḥ | gobhūhiraṇyādānāni vastradānāndyanekaṃśaḥ | sahiraṇyaṃ savastraṃ ca tebhyo dadyācca bhaktitaḥ | umāmaheśvaro devaḥ prīyatāṃ me namonamaḥ | tataḥ kuryātsvayaṃ devi bandhubhiḥ saha bhojanam | sarvānkāmānavāpnoti saubhāgyaṃ labhate dhruvam | mṛtavatsā tu yā nārī putraṃ prāpya cirāyuṣam | na punargarbhamāyāti sā gauryā saha līyate|' iti skandapurāṇe umāmaheśvarasaṃvāde sodyāpanaharitālikāvratakathā saṃpūrṇā| asyāmeva bhādrapadaśuklatṛtīyāyāṃ bhaviṣyottaroktaharikālīvratam | yudhiṣṭhira uvāca-'bhagavanharikālīti kā devī procyate bhuvi | ārdradhānye sthitā kasmātpūjyate strījanena sā | pūjitā kiṃ dadātīha sarvaṃ me brūhi keśava |' śrīkṛṣṇa uvāca |' pārtha paurāṇikīṃ divyāmataḥ śṛṇu kathāmimām | āsīddakṣasya duhitā kālī nāmnī tu kanyakā | varṇenāpi ca sā kṛṣṇā navanīlotpalaprabhā | tryambakāya ca sā dattā mahādevāya śūline | vivāhitā vidhānena śaṃkhatūryaninādinā | yajñayātrāyatairdevairbrāhmaṇānāṃ ca niḥsvanaiḥ | nirvartite vivāhe tu kālyā sārdhaṃ trilocanaḥ | krīḍate vividhaiḥ kāmairmanasaḥ prītivardhanaiḥ | atha devasamāje tu kadācidvṛṣabhadhvajaḥ | āsthānamaṇḍape ramye āste viṣṇusahāyavān | tatrasthaścāhvayāmāsa narmaṇā tripurāntakaḥ | kālīṃ nīlotpalaśyāmāṃ gaṇamātṛgaṇānvitām | ehyehi tvamitaḥ kāli bhinnakṛṣṇāñjanaprabhe | kālamapyatisaundaryāttava rūpaṃ mama priyam | ityevamuktā sā devī vrīḍitā krodhamānasā | niḥśvāsocchvāsatāmrākṣī bāṣpagadgadayā girā | ruroda sasvanaṃ bālā provāca sphuritādharā | kiṃ deva nāmnā yā gaurī sā gaurītyabhidhīyate | yasmānmamopamā dattā bhinnākṛṣṇāñjanaṃ vibho | samāje devasaṃghānāṃ vāsudevasya saṃnidhau | tasmāddehamimaṃ kṛṣṇaṃ juhomi jvalitānale | ityuktvā vāryamāṇāpi harikālī ruṣānvitā | mumoca haritacchāyā kāntiṃ haritaśādvale | cikṣepa dehaṃ roṣeṇa jvalite havyavāhane | punaḥ parvatarājasya gṛhe gaurī babhūva sā | mahādevasya dehārdhe sthitā saṃpūjyate suraiḥ | yā muktā śādvale devyā kālakāntiḥ svadehajā | sā babhūva mahāvīryā devī kātyāyanī punaḥ | tayā kṛtāni bhūrīṇi devakāryāṇi pāṇḍava | tuṣṭairdevagaṇairdatto varastasyai śṛṇuṣva me | ye tvāṃ śādvalasaṃsthāṃ vai kālīti varadāyinīm | pūjayiṣyanti puruṣā nāryo vāpi viśeṣataḥ | sarvapāpavinirmuktāḥ sukhasaubhāgyagarvitāḥ | cirāyuṣo bhaviṣyanti bhartṛputrasamanvitāḥ | evaṃ sā harikālīti gaurī sasye vyavasthitā |' śrīkṛṣṇa uvāca-'śukle bhādrapadasyaivaṃ tṛtīyāyā samācaret | saptadhānyaistu vairūḍhaiḥ kṛtvā haritaśādvalīm | kharjūrairnārikelaiśca phalaiśca madhuraistathā | mātuluṅgakusumbhaiśca dhānyakairarjirkaistathā | gandhaiḥ puṣpaiḥ phalairdhūpairnaivedyairmodakādibhiḥ | prīṇayitvā samācchādya padmarāgeṇa bhāsvatā | ghaṇṭāvādyādibhirgītaiḥ śubhairdivyakathānakaiḥ | pūjanīyā mahārāja mantreṇānena bhaktitaḥ | harernābhi samutpanne harikāli haripriye | sarvadā sasyamūrtisthe praṇatārtihare namaḥ | itthaṃ saṃpūjya tāṃ devīṃ dadyādviprāya dakṣiṇām | kṛtvā jāgaraṇaṃ rātrau prabhāte kiṃcidudgate | ravau suvāsinībhiśca sā neyā tu jalāśaye | tato jalāśaye ramye mantreṇaiva visarjayet | arcitāsi mayā bhaktyā gaccha devi surālayam | mama daurbhāgyanāśāya punarāgamanāya ca | evaṃ yaḥ pāṇḍavaśreṣṭha harikālīvrataṃ caret | prativarṣa vidhānena nārī vā bhaktitatparā | nītvā yatphalamāpnoti tadanyena na cāpyate | martyaloke ciraṃ jīvetsarvakāmaiḥ supūjitā | putrapautrasuhṛnmitranaptṛdauhitrasaṃkulam | sārdhaṃ varṣaśataṃ jīvedbhogānbhuktvā mahītale | tato'vasāne dehasya śivaloke mahīyate | vīrabhadramahākālanandīśvaravināyakāḥ | sarve prasādasumukhā bhavanti vratayogataḥ | saṃpūjya śūrpagatasaptavirūḍhasasyāṃ devīṃ himādritanayāṃ harikālikākhyām | naivedyajāgarasamuddhatagītavādyaiḥ saṃprāpnuvanti manujāḥ suciraṃ sukhāni |' iti bhaviṣyottaroktaṃ harikālīvratam