Jayasimhakalpadruma 4.p74.3

4.p74.3

naktāhāreṇa rājendra tilānāṃ pāraṇaṃ smṛtam | tadevāgnau ca hotavyaṃ taddeyaṃ brāhmaṇepu ca |' pūjāmantrastu | 'divyāya śūrāya gajānanāya daṃṣṭrākarālayā namaḥ śivāya | nagātmajādeha malodbhavāya kuṭhārahastāya namo varāya | tāmrapātraiḥ pāyasādyaiścaturbhiḥ sahitaṃ nṛpa | pañcamena tilaiḥ sārdhaṃ gaṇaśāntikareṇa ca |' nirṇayāmṛte tu- 'āyasaiḥ pañcabhiḥ pātrairupetaṃ navabhistathā|' iti pāṭhaḥ | 'mṛṇmayāni daridrastu vidhinānena kārayet | cāturmāsyavrataṃ caiva kṛtvaivaṃ pañcame tathā|' anena mantreṇa pūjāṃ kṛtvā svāhāntena tilānnaṃ hutvā brāhmaṇebhyo dattvā svayamapi tadeva naktamaśnīyāt | 'sauvarṇaṃ gajavaktraṃ tu kṛtvā viprāya dāpayet | itthaṃ vratamidaṃ kṛtvā sarvavighnātpramucyate|' nirṇayāmṛte-evaṃ māsacatuṣṭaye vrataṃ kṛtvāṣāḍhaśuklacaturthyāṃ sauvarṇavināyakadānamātraṃ kuryāditi | 'hayamedhasya vighne tu saṃjāte sagaraḥ purā | etadeva caritvā tu hayamedhaṃ samāptavān | etadeva haraścakre tripuro yena ghātitaḥ | mayā samudramathane tvetadeva vrataṃ kṛtam | anyairapi mahīpālairetadeva purā kṛtam | tato nirvighnasiddhayarthaṃ vighnopaśamanaṃ param | anena kṛtamātreṇa sarvavighnaiḥ pramucyate| tato rudrapurīṃ yāti varāhavacanaṃ yathā | vighnāni tasya na bhavanti gṛhe kadāciddharmārthakāmasukhasiddhivighātakāni | yaḥ saptamīnduśakalākṛtikāṃtadantaṃ vighneśamarcayati naktakṛtī caturthyām |' iti vārāhapurāṇoktamavighnavināyakavratam | nirṇayāmṛte matsyapurāṇe-'caturthyāṃ naktabhugdadyādabdānte hemavāraṇam | vrataṃ vaināyakaṃ nāma śivalokaphalapradam |' iti |