Jayasimhakalpadruma 4.p95.1

4.p95.1

asyāmeva pañcamyāmūpāṅgalalitāvrataṃ mahārāṣṭreṣu prasiddham | tatra yadyapi kathāyāṃ kālaviśeṣo noktastathāpi 'rātrau jāgaraṇaṃ kuryādgītavāditraniḥsvanaiḥ |' iti rātrau jāgarokteḥ, śaktipūjāyā rātrau prāśastyāt | 'vratasyāsya phalaṃ proktaṃ jāgare munisattamāḥ |' iti vacanena jāgarasya prādhānyāt yugmavākyācca | 'bhuktvā jāgaraṇe naktaṃ candrārghyavrate tathā | tārāvrateṣu sarveṣu rātriyogo viśiṣyate |' iti kālahemādrau vacanādapi rātrirgrāhyeti bhaṭṭojidīkṣitaprabhṛtayaḥ | pūrvaviddheti mādhavamadanaratnādīnāmapi matam | caturthī saṃyutā kāryeti pūrvoktavacanāt | rātriśabdaḥ pūrvaviddhāvacana iti hemādririti nirṇayasindhustanmate'pi pūrvaviddhaiva | divodāsīye'pyevameva | mayūkhakṛntyaratnāvalyādau tu-'pūjāvrateṣu sarveṣu madhyāhnavyāpinī tithiḥ|' iti sāmānyavacanānmadhyāhnavyāpinī grāhyetyuktam | ubhayatra tathātve'tathātve vā pūrvodāhṛtavacanebhyaḥ pūrvaivsyāpi kṛtyaratnāvalyām|atha vratavidhiḥ|prātaḥkṛtyaṃ nirvartyāṣṭācatvāriṃśatsaṃkhyānyapāmārgadantakāṣṭhānyupādāya jalāśaya gatvā āyurbalamiti mantreṇa dantakāṣṭhamabhimantrya mukhadurgandhināśāyeti mantreṇa tāvatsaṃkhyayā dantadhāvanāni snānāni ca kṛtvā tataḥ snānavidhinā snātvā śuklaṃ vāsaḥ paridhāya gṛhaṃ gatvā śucau deśe maṇḍapikāṃ kṛtvā tatra sauvarṇī pratimāṃ sthāpayet|ācamya prāṇānāyamya māsapakṣādyullikhya putradhanavidyāroganirmuktisukhagovijayapuṣṭyādikāmaḥ, strī tvavaidhavyakāmā upāṅgalalitāprītyarthaṃ yathāmilitopacāraiḥ upāṅgalalitāpūjanamahaṃ kariṣye, iti saṃkalpya pūjāṃ kuryāt |