Jayasimhakalpadruma 5.p24

5.p24

asyāmeva jyeṣṭhāyuktāyāṃ jyeṣṭhāpūjā karttavyā | ‘kanyāsthārkaṣṭamī śuklā jyeṣṭharkṣe mahatī smṛtā| alakṣmīparihārāya jyeṣṭhāṃ tatra prapūjayet|’iti liṅgapurāṇāt| atra kanyā sthārkayogena prāśastyamātram| māsastu bhādrapadaścāndra eva| kālādarśopi-‘bhādre śuklāṣṭamī jyeṣṭhānakṣatreṇa samanvitā | mahatī kīrtitā tasyāṃ jyeṣṭhāṃ devīṃ prapūjayet |’ iti | yattu jyeṣṭhānakṣatramātrāpekṣaṃ tithivratādbhinnaṃ jyeṣṭhārūpaṃ vrataṃ tadyasyāṃ tithau jyeṣṭhānakṣatraṃ bhavati tasyāṃ tithau kartavyam | taduktaṃ mādhavīye skānde-‘māsi bhādrapade śukle pakṣe jyeṣṭharkṣasaṃyute | yasminkasmindine kuryājjyeṣṭhāyāḥ paripūjanam |’ iti | Ashtamyaḥ khaṇḍatve jyeṣṭhāyogavaśena pūrvā parā vā grāhyā dinadvayayoge tadabhāve'pi vā parā | pūrve'hni rātriyoge pūrveva | ‘navamyā saha kāryā syādaṣṭamī nātra saṃśayaḥ | māsi bhādrapade śukle pakṣe jyeṣṭharkṣasaṃyutā | rātriryasmindine tatra jyeṣṭhāyāḥ paripūjanam |’ iti tatraivokteḥ | asyāpavādaḥ |‘ yasmindine bhavejjyeṣṭhā madhyāhnādūrdhvamapyaṇuḥ | tasminhaviṣyaṃ pūjā ca nyūnā cetpūrvavāsare|’ iti | jyeṣṭhānakṣatravrate tasya khaṇḍatve'ṣṭamī bhānuvārayuganyatarayugvā jyeṣṭhānakṣatraṃ grāhyam | ‘tatrāṣṭamyāṃ yadā vāro bhānorjyeṣṭharkṣameva vā | nīlajyeṣṭheti sā proktā durlabhā bahukālikī |’ iti skāndāt | anyatarayogasyāpyabhāve madhyāhnādūrdhvamanuvarttamānaṃ grāhyam | pūrvoktaskāndāt | tathā| ‘maitreṇāvāhayeddevīṃ jyeṣṭhāyāṃ tu prapūjayet| mūle visarjayeddevīṃ tridinaṃ vratamuttamam |’ iti | viśākhāyoge sati jyeṣṭhānayanamanurā-