Jayasimhakalpadruma 5.p5

5.p5

iyameva śītalāṣṭamī | skanda uvāca- 'bhagavañchītalāstotraṃ vada devyā mahatphalam | atīva bhaktirme jātā vrataṃ cāpi bravīhi me|' īśvara uvāca-'sādhu vatsa mahābhāga yatpṛcchasi vratottamam | kathayāmi yathāpūrvaṃ pārvatyā tvatkṛte kṛtam | sarvopadravanāśāya sarvavighnopaśāntaye | caitre māsryasite pakṣe yā'ṣṭamī śītalāhvayā | tāmārabhya prakartavyaṃ yāvanmāsacatuṣṭayam | patiputrasametābhiryoṣidbhiḥ śraddhayānvitam | vidhānaṃ śṛṇu me vatsa yena samyakprapūjayet | suśītalajalaiḥ snātvā sthāne gomayalepite | sugandhaiḥ śītalaistoyaiḥ kalaśaṃ lakṣaṇānvitam | āpūrya vidhivattaṃ ca sthāpayettatra śītalām | likhitvāvāhya tāṃ mūrti pūjayedvidhinā'munā | puṣpacandanakarpūravāsitaṃ śītalaṃ jalam | pādyārghyācamanīyaṃ ca śītale pratigṛhyatām | pāyādisarvasaṃtāpaśamanaṃ pratigṛhyatām | candanaṃ śītalaṃ devi matkulaṃ śītalaṃ kuru | kharayānasamārūḍhe nimbapallavadhāriṇi | śītale kuru kalyāṇaṃ pūjeyaṃ pratigṛhyatām | saṃpūjya vidhivaddevīṃ śṛṇuyācchītalāṣṭakam | pūrvaṃ mayaiva saṃproktaṃ tacchṛṇu tvaṃ samāhitaḥ | namāmi śītalāṃ devīṃ rāsabhasthāṃ digambarām | mārjanīkalaśopetāṃ śūrpālaṃkṛtamastakām |' skanda uvāca — 'bhagavandevadeveśa śītalāstotramuttamam | vaktumarhasyaśeṣeṇa visphoṭakamayāpaham|' īśvara uvāca-' vande'haṃ śītalāṃ devīṃ sarvarogabhayāpahām | yāmārādhya nivarteta visphoṭakabhayaṃ mahat | śītale śītale ceti yo brūyāddāhapīḍitaḥ | visphoṭakamayaṃ pāpaṃ kṣipraṃ tasya praṇaśyati | yastvāmudakamadhye tu dhyātvā pūjayate naraḥ | visphoṭakamayaṃ ghoraṃ kule tasya na jāyate | śītale jvaradagdhasya pūtigandhagatasya ca | praṇaṣṭacakṣuṣaḥ puṃsastvāmāhurjīvanauṣadham | śītale tanujātrogānnṛṇāṃ harasi dustyajān | visphoṭakaviśīrṇānāṃ tvamekāmṛtavarṣiṇī | galagaṇḍagrahā rogā ye cānye dāruṇā nṛṇām | tvadanudhyānamātreṇa śītale yānti saṃkṣayam | na mantraṃ nauṣadhaṃ kiṃcitpāparogasya vidyate| tvamekā śītale dhātrī nānyāṃ paśyāmi devatām| mṛṇālantusahaśīṃnābhihanmadhyasaṃsthitām| yastvāṃ cintayate devi tasya mṛtyurna jāyate| śītale tvaṃ jaganmātā śītale tvaṃ jagatpitā | śītale tvaṃ jagaddhātrī śītalāyai namo namaḥ| śītalāṣṭakamevedaṃ na deyaṃ yasya kasyacit | dātavyaṃ hi sadā tasmai yaḥ śraddhābhaktisaṃyutaḥ | śrotavyaṃ paṭhitavyaṃ ca śraddhābhaktisamanvitaiḥ | upasargavināśāya paraṃ svastyayanaṃ mahat | rāsabho gardabhaścaiva kharo vaiśākhanandanaḥ | śītalāvāhanaṃ caiva dūrvākrandanakandanaḥ | etāni kharanāmāni śītalāgre ca yaḥ paṭhet| tasya dehe ca gehe ca śītalāruṅna jāyate|' iti śītalāṣṭakam | 'tataḥ kṣamāpya tāṃ devīṃ dadyādviprāya dakṣiṇām | secayettena toyena svātmānaṃ patiputrakam | bhojanaṃ yatprakartavyaṃ tacchṛṇu tvaṃ ṣaḍānana | bhakṣayedvaṭakā npūpāṃścaitre śītalajalānvitān | vaiśākhe saktukaṃ tāvatsājyaṃ śarkarayānvitam | jyeṣṭhe śaṣkulikāḥ śītāḥ polikāṃśca tathāvidhāḥ| āṣāḍhe pāyasaṃ sājyaṃ sitaśarkarayānvitam | etanmāsavidhānaṃ te kathitaṃ pārvatīsuta | evaṃ yā kurute nārī vrataṃ varṣacatuṣṭayam | tata udyāpanavidhiṃ vāñchitaṃ phalamāpnuyāt | tatkule nopasarpanti galagaṇḍagrahādayaḥ | na ca vyādhibhayaṃ tasyāḥ putrapautrasamanvitā | patisaukhyayutā sādhvī cirakālaṃ pramodte |' iti skandapurāṇe śītalāstotraṃ samāptam | caitraśuklāṣṭamyāṃ bhavānyā utpattiḥ | tatrāṣṭamīyuktā navamī, navamī cāṣṭamīyukteti brahmavaivartāyugmavākyācca parā | atra bhavānīyātrā kā kāśīkhaṇḍe-'caitrāṣṭamyāṃ mahāyātrāṃ bhavānyāḥ kārayetsudhīḥ | aṣṭādhikāḥ prakarttavyāḥ śatakṛtvaḥ pradkṣiṇāḥ | bhavānīṃ yastu paśyeta śuklāṣṭamyāṃ madhau punaḥ | na jātu śokaṃ labhate sadānandamayo bhavet |' iti