Jayasimhakalpadruma 5.p6

5.p6

atraivāśokakalikāśanaṃ laiṅge-'aśokakalikāścāṣṭau ye pibanti punarvasau| caitre māsi sitāṣṭamyāṃ na te śokamavāpnuyuḥ |' kaurme-' caitre māsi sitāṣṭamyāṃ budhavāre punarvasau | aśokakusumai rudramarcayitvā vidhānataḥ | aśokasyāṣṭa kalikā mantreṇoktena bhakṣayet | śokaṃ naivāpnuyānmartyo rūpavānapi jāyate|' iti | atra punarvasuyogaḥ prāśastyārthaḥ | 'tithiḥ śarīraṃ devasya tithau nakṣatramāśritam | tasmāttithiṃ praśaṃsanti na nakṣatraṃ tithiṃ vinā |' iti jyotiḥśāstrāditi kṛtyeratnāvalyām| ata eva liṅgapurāṇe-- 'aśokakalikāpānamaśokatarupūjanam | śuklāṣṭamyāṃ tu caitrasya kṛtvā prāpnoti nirvṛtim |' ityatra kevalāṣṭamyupādānam| prāśanamantrastu liṅgapurāṇe-'tvāmaśoka harābhīṣṭa madhumāsasamudbhava|pibāmi śokasaṃtapto māmaśokaṃ sadā kuru|'iti kūrmapurāṇoktastu'tvāmaśoka namāmyenaṃ madhumāsasamudbhavam | śokārtaḥkalikāṃ prāśya māmaśokaṃ sadā kuru|' iti | ityaśokāṣṭamīvratam | tithitattve skāānde-'mīne madhau śuklapakṣe aśokākhyāṃ tathāṣṭamīm | pibedaśokakalikāṃ snāyāllauhityavāriṇi|' iti | atra madhuścāndraḥ pṛthaṅmīnagrahaṇāt|nirṇayasindhau tithitattve kālikāpurāṇe'pi-'caitre māsi sitāṣṭamyāṃ yo naro niyatendriyaḥ|'snāyāllauhityatoyeṣu sa yāti brahmaṇaḥ padam | caitraṃ tu sakalaṃ māsaṃ śuciḥprayatamānasaḥ| lauhityatoye yaḥ snāyātsa kaivalyamavāpnuyāt|'lohito brahmaputraḥ| snānamantrastu-'brahmaputra mahābhāga śantanoḥ kulasaṃbhava | amoghagarbhasaṃbhūta pāpaṃ lauhitya me hara|' iti | pṛthvīcandrodaye viṣṇuḥ-'punarvasubudhopetā caitre māsi sitāṣṭamī|prātastu vidhivatsnātvā vājapeyaphalaṃ bhavet |'iti|nirṇayāmṛte-asyāmevāṣṭamyāṃ mahāpūjā kāryā| taduktaṃ mārkaṇḍeyapurāṇe-'śaratkāle mahāpūjā kriyate yā ca vārṣikī | tasyāṃ mamaitanmāhātmyaṃ śrutvā bhaktisamanvitaḥ|'iti | atra yā ca vārṣikītyanena saṃvatsarasyādau caitraśuklapratipadamupakramyāṣṭamīparyantaṃ kriyamāṇā pūjā'bhidhīyate | tataśca śaradvasantayo stulya eva durgotsavaḥ | iti caitrāṣṭamīvratāni