Jayasimhakalpadruma 5.p8

5.p8

prasādhanam | śrāvaṇe śuklapakṣe tu aṣṭamyāṃ vāyubhojanaḥ | ' snātvā sārdrapaṭo bhūtvā devīṃ kṣīreṇa saṃsnāpya pāyasanaivedyaṃ dattvā svayaṃ bhuñjīta | iti durgāvratam | atha janmāṣṭamī nirṇīyate | sā cāmāntamāsapakṣe śrāvaṇakṛṣṇāṣṭamī, pūrṇimāntabhādrapadamāsapakṣe kṛṣṇāṣṭamī | ubhayathāpyekaiva | ubhayavirodho'pi smārtavyavahāro darśayiṣyate | sā ca dvividhā, śuddhā viddhā ca | tatra śuddhāyāmaṣṭau bhedāḥ, viddhāyāṃ cāṣṭau | tatra saptamīyogarahitā śuddhā, saptamīyuktā viddhā, | śuddhā ca trividhā | samā, nyūnā, adhikā ceti | tatra sūryodayādudayaparyantaṃ sthitā samā | tato'rvāṅnivṛttā nyūnomatikramya pravṛttā adhikā | viddhā'pi samanyūnādhikabhedena tridhā | tatra śuddhāsamā rohiṇīsahitā tadrahitā ceti dvividhā| śuddhanyūnā'pi rohiṇīsahitā tadrahitā ceti dvividhā | śuddhādhikā tu pūrvadina eva rohiṇīsahitā paradina eva rohiṇīsahitā ubhayatra rohiṇīsahitā ceti caturvidhā | evaṃ viddhasamāpi rohiṇīsahitā tadrahitā ceti dvividhā | viddhanyūnāpi rohiṇīsahitā tadrahitā ceti dvividhā | viddhādhikā tu pūrvadina eva rohiṇīsahitā, paradina eva rohiṇīsahitā, ubhayatra rohiṇīsahitā, ubhayatra rohiṇīrahitā ceti caturvidhā | evaṃ viddhāpyaṣṭavidhā | ubhayeṣāṃ śuddhaviddhābhedānāṃ melane ṣoḍaśaprakārā bhavanti | dvāvanyāvavāntarabhedau | yathā ardharātre rohiṇīyuktāṣṭamī jayantītyekaḥ | dvitīyo navamīyuktāṣṭamyāṃ budhavārasomavārayoranyatareṇa yoge | evamaṣṭādaśaprakārā janmāṣṭamī | tatra sakāmainiṣkāmaiśca sarvathopavāsaḥ kartavyaḥ | ' gṛdhramāṃsaṃ kharaṃ kākaṃ śyenaṃ vā munisattama | māṃsaṃ ca dvipadaṃ bhuṅke kṛṣṇajanmāṣṭamīdine|' tathā-'janmāṣṭamī dine prāpte yena bhuktaṃ dvijottama | trailokyajanitaṃ pāpaṃ bhuktaṃ tena na saṃśayaḥ | ye na kurvanti jānantaḥ kṛṣṇajanmāṣṭamīvratam | te bhavanti mahāprājña vyālā mahati kānane | śrāvaṇe bahule pakṣe kṛṣṇajanmāṣṭamīvratam | na karoti naro yastu sabhavaidvrakṣarākṣasaḥ | akurvannarakaṃ yāti yāvadindrāścaturdaśa | atītānāgataṃ tena kulamekottaraṃ śatam | pātitaṃ narake ghore yo bhuṅke kṛṣṇavāsare | raṭantīha purāṇāni bhūyobhūyo mahāmune |' tathā-' kṛṣṇajanmāṣṭamīṃ tyaktā ye'nyadvatamupāsate | nāpnuvanti śubhaṃ kiṃcidiṣṭapūrtamathāpi vā | śrāvaṇe bahule pakṣe na karoti yadā'ṣṭamīm | krūrāyudhāḥ krūramukhā hiṃsanti yamakiṃkarāḥ |' ityādivākyairakaraṇe pratyavāyaśravaṇāt | 'varṣe varṣe