Jayasimhakalpadruma 8.p1.4

8.p1.4

'vaiṣṇavo vā'tha śaivo vā sauro'pyetatsamācaret |' iti saurapurāṇe'bhidhānāt | vratarūpo'pi dvidhā | nityaḥ kāmyaśca | nitya ukto gāruḍe-'upoṣyākādaśīṃ nityaṃ pakṣayorubhayorapi |' iti | sanatkumāro'pi-'pakṣe pakṣe ca kartavyamekādaśyāmupoṣaṇam |' iti | nārado'pinityaṃ bhaktisamāyuktairnarairviṣṇuparayaṇaiḥ | pakṣe pakṣe ca kartavyamekādaśyāmupoṣaṇam |' iti | sanatkumāro'pi-'ekādaśī sadopoṣyā pakṣayoḥ śuklakṛṣṇayoḥ|' iti | viṣṇupurāṇe'pi-'dvādaśī na prayoktavyā yāvadāyuḥ suvṛttibhiḥ |' iti | agnipurāṇe'piupoṣyākādaśī rājanyāvadāyuḥ suvṛttibhiḥ |' iti | kaṇvo'pi-'ekādaśīmupavasenna kadācidatikramet |' iti | nārado'pi-'pakṣe pakṣe ca kartavyamekādaśyāmupoṣaṇam |' iti | mādhavīye akaraṇe doṣamāha sanatkumāraḥ-'na karoti naro mūḍha ekādaśyāmupoṣaṇam | sa naro narakaṃ yāti rauravaṃ tamasā hatam | ekādaśyāṃ muniśreṣṭha yo bhuṅkte mūḍhacetanaḥ | pratimāsaṃ sa bhuṅkte tu kilviṣaṃ śvādiviṭsamam | niṣkṛtirmadyapasyoktā dharmaśāstre manīṣibhiḥ | ekādaśyannakāmasya niṣkṛtiḥ kāpi noditā | madyapānānmuniśreṣṭha pātaiva narakaṃ vrajet | ekādaśyannakāmastu pitṛbhiḥ saha majjati |' iti | nāradīye'pi'yāni kāni ca pāpāni brahmahatyāsamāni ca | annamāśritya tiṣṭhanti saṃprāpte harivāsare | tāni pāpānyupāśnāti bhuñjāno harivāsare |' iti | skānde'pi'mātṛhā pitṛhā caiva bhrātṛhā guruhā tathā | ekādaśyāṃ tu yo bhuṅkte pakṣayorubhayorapi |' iti | kvacittu 'ekādaśyāṃ tu bhuñjāno viṣṇulokāccyuto bhavet |' iti pāṭhaḥ | brahmavaivarte'pi-' sa kevalamaghaṃ bhuṅkte yo bhuṅkte harivāsare |