Jayasimhakalpadruma 8.p1.5
Jayasīṃhakalpadruma 8.p1.5
- Language
- Sanskrit
8.p1.5
dine tu sarvapāpāni bhavantyannasthitāni tu | tāni mohena yo'śnāti na sa pāpairvimucyate |' iti | vidhavāyāstu doṣaviśeṣaḥ pradarśitaḥ kātyāyanena-'vidhavā yā bhavennārī bhuñjītaikādaśīdine | tasyāstu sukṛtaṃ naśyedbhūṇahatyā dinedine |' iti | akaraṇa ivāsamāpane'pi doṣa ukto viṣṇurahasye- ' samādāya vidhānena dvādaśīvratamuttamam | tasya bhaṅgaṃ naraḥ kṛtvā rauravaṃ narakaṃ vrajet | parigṛhya vrataṃ samyagekādaśyā vrataṃ naraḥ | na samāpayate tasya gatiḥpāpīyasī bhavet |' iti | nāradīye'pi-'dvādaśīvratamādāya vratabhaṅgaṃ karoti yaḥ | dvādaśābdaṃ vrataṃ cīrṇaṃ niṣphalaṃ tasya jāyate |' iti | atyāgavidhirdarśito viṣṇurahasye-'paramāpadamāpanne harṣe vā samupasthite | sūtake mṛtake vāpi na tyājyaṃ dvādaśīvratam |' iti nityatvabodhakāni | atha kāmyatvabodhakāni | ' yadīcchedviṣṇusāyujyaṃ śubhāṃ saṃpadamātmanaḥ | ekādaśyāṃ na bhuñjīta pakṣayorubhayorapi |' kātyāyano'pi-'saṃsārasāgarottāramicchanviṣṇuparāyaṇaḥ | aiśvaryaṃ saṃtatiṃ svargaṃ muktiṃ vā yadyadicchati | ekādaśyāṃ na bhuñjīta kadācidapi mānavaḥ |' skānde'pi- 'yadīccheddipulānbhogānmuktiṃ vā'tyantadurlabhām | ekādaśyāmupavasetpakṣayorubhayorapi | īdṛṅmahātmyaratnāni śāstrāmbhodhau sphurantyapi | kiṃ saṃgṛhītuṃ śaktaḥ syādgaṅgaḥ kṛṣṇakṛpāṃ vinā|' ityādi | atra nirṇayāmṛtakāraḥ | nityatvavidhāyakavākyaśravaṇātkiṃ nityaṃ kiṃ vā kāmyatvavidhāyakavākyaśravaṇātkāmyamiti | atra kaścidāha nityakāmyamiti | tanna yuktisaham | yato yadeva nityaṃ tadeva kāmyamiti karmadhārayasamāsasyārthaḥ | sa nopapadyate |
Linked texts (6)
- Bhagavantabhāskara — Nīlakaṇṭha Dīkṣita 1625, Sanskrit
- Pratāpārka — Viśveśvarabhaṭṭa 1766, Sanskrit
- Gadādharapaddhati — Gadādhara Rājaguru 1725, Sanskrit
- Kālanirṇaya (Kālamādhavīya) — Mādhava, Sanskrit
- Kāladīpa — Divyasiṃha Mahāpātra 1640, Sanskrit
- Smṛtiprakāśa — Vāsudeva Ratha, Sanskrit