Madanaparijata 10.p1.28

10.p1.28

naimittike kālakāmau kāmye ca dhurilocanau
pururavādvravau† caiva pārvvaṇe samudāhṛtau
utpattiṃ nāma caiteṣāṃ na viduryye dvijātayaḥ
ayamuccāraṇīyastaiḥ ślokaḥ śrāddhasamanvitaiḥ
āgacchantu mahābhāgāḥ viśvedevā mahābalāḥ
ye yatra vihitāḥ śrāddhe sāvadhānā bhavantu te
dṛṣṭyā''mādhānādau kriyamāṇaṃ nāndīmukhe vṛddhiśrāddhe naimittike
sapiṇḍīkaraṇe kāmanayānuṣṭheyagayāmahālayādiśrāddhaṃ kāmyam
pārvvaṇaṃ darśaśrāddhaṃ sakalaśrāddhaprakṛtibhūtam | yadā mahālayāśrāddhaṃ kevalanityabuddhyā karoti tadā purūravādravāveva | yadā
tu kevalakāmyabuddhyā tadā dhurilocanāveva | yadā tu ubhayabuddhyā tadāpi dhurilocanāveva | yataḥ kāmyaṃ nityasya bādhakam
yadā tu godohanena paśukāma itivadguṇaphalādhikāraḥ
syāttadopakrame kāmanābhāvānnityakarmamāśrayaṇena guṇaphalavidheśca
purūravārdravāveveti vivekaḥ
anenaivābhiprāyeṇa ādipurāṇe
viśvedevau kraturdakṣaḥ sarvvāsviṣṭiṣu kīrttitau
nityaṃ nāndīmukhaśrāddhe vasukatyau ca paitṛke
navānnalambhanārddiṣṭe kālakāmau sadaiva hi
api kanyāgate sūryye śrāddhe ca dhurilocanau
purūravārdravau caiva viśvedevāśca pārvvaṇe || iti
paitṛke navānnalambhane navānnalābharūpanimittena pitṛbhaktyā
pūjanāttena śrāddhe kriyamāṇe athavā navānnalambhanaṃ sapiṇḍīkaraṇaṃ pitṛbhiḥ sārddhaṃ tatraivānnasya prathamata eva lābhānnavānna
lambhanam
āvāhanāntaraṃ yājñavalkyaḥ
yavairanvavakīryyātha bhājane sapavitrake
śanno devyā apaḥ kṣiptvā yavo'sīti yavāṃstathā
viśvedevasthāne arghyapātramekaṃ dve vā pitṛsthāne ekaṃ trīṇi vā
ṣaḍdaivatye ṣaḍ vā kurvīta
arghyapātrāṇyāha kātyāyanaḥ