Madanaparijata 10.p1.29

10.p1.29

sauvarṇarājatāvudumbarakhaḍgamaṇimayānāṃ pātrāṇāmanyatameṣu vā niṣpādyante patrapuṭikādiṣu ceti
anniṣiddheṣviti śeṣaḥ | rājataṃ daive niṣiddham
matsyapurāṇe
śivanetrodbhavaṃ yasmāttatastat pitṛvallabham
amaṅgalaṃ sadā tena devakāryyeṣu varjjitam
caturviṃśatimate
dve dve śalāke devānāṃ pātre kṛtvā payaḥ kṣipet
śanno devyā yavo'sīti yavānapi tataḥ kṣipet
puṣpadhūpādibhiḥ pūjāṅkṛtvā pātreṣu mānavaḥ
pitṛpātre viśeṣo'yaṃ tilo'sīti tilān kṣipet
tisrastisraḥ śalākāstu pitṛpātreṣu pārvvaṇe
ekoddiṣṭe śalākaikāṃ nidhāyodakamāharet
śalākāḥ sāgrakuśāḥ
yogiyājñavalkyaḥ
pavitre stha iti mantreṇa dve pavitre ca kārayet
anantargarbhitaināgracchinne prādeśasammitai
pavitre stho vaiṣṇavīrvāyuśvāṅamanasā punātviti mantraḥ
yajñapārśvaḥ
oṣadhīrantare kṛtvā aṅguṣṭhāṅguliparvvaṇā
chindyātprādeśamātrantu pavitraṃ viṣṇudaivatam
evamardhyapātrasthāpanānantaraṃ yājñavalkyaḥ
yā divyā iti mantreṇa hasteṣvarghyaṃ vinikṣipet
pratyarghyaṃ dānamantrāvṛttiḥ | evamudakaprakṣepe'pi
atra viśeṣamāha gārgyaḥ
dattvā haste pavitre tu kṛtvā pūjāñca pādyataḥ
yā divyā iti mantreṇa hasteṣvarghyaṃ vinikṣipet
brahmapurāṇe
tato vāmena hastena gṛhītvā camasān kramāt
pitṛtīrthena tattoyaṃ dakṣiṇena ca pāṇinā
viśvedevasthāne devatīrthena dadyātpitṛsthāne pitṛtīrthena dadyāditi vivekaḥ | tataśca saṃsravāṃstatpātre gṛhītvā viśvebhyo
devebhyaḥ sthānamasīti pātramuttānaṃ nidadhīta
tathāca yājñavalkyaḥ
dattvārghyaṃ saṃsravāṃsteṣāṃ pātre kṛtvā vidhānataḥ
pitṛbhyaḥ sthānamasīti nyubjaṃ pātraṅkarotyadhaḥ