Madanaparijata 10.p1.34

10.p1.34

ataeva yamaḥ
devaviprakare'nagniḥ kṛtvānīkaraṇaṃ dvija iti
atrāpi śeṣaṃ devapātre na nikṣipet
tathāca vāyupurāṇe
hutvā devakare'gniḥ śeṣaṃ pitrye nivedayet
na hi smṛtāḥ śeṣabhājo viśvedevāḥ purātanaiḥ
ataḥ pitryadevakāryyorvikalpaḥ
tathā
vaiśvadeve yadekasmin bhāvavuddhyādayodvijāḥ
tadaikapāṇau hotavyaṃ syādvidhirvihitastadā
ekasmin śrāddhe viśvedevasthāne dvau catvāra ityevaṃ prakāreṣvityarthaḥ
yadā mātāmahaśrāddhaṃ na tantreṇa kintu pṛthageva tadā mātāmahaśrāddhe paṅktimūrddhanyapāṇāvapi pṛthaghomaḥ
tathāca kātyāyanaḥ
mātāmahasya bhede'pi kuryyāttatraiva sāgnikaḥ
iti mātāmahasthāne vaiśvadevikapitrye brāhmaṇabhede'pi bhedapakṣe'pi
tatraiva tatprayuktapāṇihomastatraiva mātāmahaśrāddhaprayuktabrāhmaṇahastaevāgnābhāva ityarthaḥ | yuktañcaitat agnisthānīyasya pāṇeḥ pṛthaktvāt homo hastaśca homādhikaraṇaṃ pṛthagiti haviruddharaṇamapi
pṛthageva pāṇau hutañca na pṛthagbhoktavyam
yadāhurgṛhyakārāḥ
annaṃ pāṇitale dattaṃ pūrvvamaśnantyabuddhayaḥ
pitarastena tṛpyanti śeṣānnaṃ na labhanti te
yacca pāṇitale dattaṃ yaccānyadupakalpitam
ekīkṛtyaiva bhoktavyaṃ pṛthagbhāvo na vidyate