Madanaparijata 10.p5.12

10.p5.12

tadā tadanantaraṅkarttavyaṃ nyāyasiddhatvāt| tatrāpyasambhave uparitanamāsikadine kāryyam
yadāha ṛṣyaśṛṅgaḥ
ekoddiṣṭe tu samprāpte yadi vighnaḥ prajāyate
māse'nyasmiṃstithau tasyāṃ kuryyādantaritañca tat
antaritaṃ vighnena tacca tacchabdena anyamāsasvakālaprāptamucyate
ekādaśāhādikantu jyeṣṭhenaiva karttavyam
tathāca pracetāḥ
ekādaśādyāḥ kramaśo jyeṣṭhasya vidhivatkriyāḥ
kuryyurnaikaikaśaḥ śrāddhamābdikantu pṛthak pṛthak
ābdikantu pṛthak pṛthagiti vibhaktaviṣayam
atha navaśrāddhāni
tatrāṅgirāḥ
prathame'hni tṛtīye'hni pañcame saptame tathā
navamaikādaśe caiva navaśrāddhamprakīrttitam
baudhāyanaḥ
maraṇādviṣamadineṣvekaikaṃ navaśrāddhaṃ kuryyāt | ānavamamādyantanavamaṃ vicchidya naikādaśe'hni tatkuryyāditi
bhaviṣyapurāṇe
nava sapta viśāṃ rājñāṃ navaśrāddhānyanukramāt
ādyantayorvarṇayostu ṣaḍityāhurmaharṣayaḥ
śivasvāmī
navaśrāddhāni pañcāhurāśvalāyanaśākhinaḥ
āpastambaḥ
ṣaḍityāhurvibhāṣā taittirīyāṇām
kaṇvaḥ
navaśrāddhaṃ māsikañca yadyadantaritaṃ bhavet
tattaduttarasātantrādanuṣṭheyampracakṣate
atha sapiṇḍīkaraṇam
tatra śaunakaḥ
catvāryudakapātrāṇye kaṃ pretasya trīṇi itareṣāṃ prathamapātram triṣu pātreṣu niyojayet | samānī va ākṛti -
rityevameva prathamapiṇḍaṃ triṣu piṇḍeṣu niyojayet
madhumatībhiḥ saṅgacchadhvamiti dvābhyāmeva† caturtho'nujñāpito bhavati iti prete ciramṛte
viṣṇuḥ
saṃvatsarānte pretāya tatpitre tatpitāmahāya tataḥ tatprapitāmahāya ca brāhmaṇān bhojayedagnaukaraṇamāvāhanaṃ
pātraṃ kuryyāt | saṃsṛjyantu tvā pṛthivī samānīva iti