Madanaparijata 9.1.3

9.1.3

chinne nāle tataḥ paścātsūtakantu vidhīyate
yacca viṣṇudharmmottare
acchinnanābhyāṅkarttavyaṃ śrāddhaṃ vai putrajanmani
aśaucoparame kāryyamathavā niyatātmabhiḥ || iti
tattu karttṛpradhānādyapekṣayā† veditavyam
tathāca vaijavāpaḥ
janmano'nantaraṅkāryyaṃ jātakarma yathāvidhi
daivādatītakālañcedatīte sūtake bhavet || iti
tacca śrāddhamāmena
ataeva pracetāḥ
strī śūdraḥ śvapacaścaiva jātakarmaṇi cāpyatha
āmaśrāddhaṃ sadā kuryyādvidhinā pārvvaṇena tu || iti
āmābhāve hemnā
tathāca vyāsaḥ
dravyālābhe dvijālābhe pravāse putrajanmani
hemaśrāddhamprakurvvīta yasya bhāryyā rajasvalā
dravyābhāve āmadravyālābhe yasya bhāryyetyayaṃ pakṣaḥ śrāddhastavake
vyākhyāsyate | pratigrahaśca nābhivarddhanātpūrvaṃ tadaharvvā
yathāha śaṅkhaḥ
kumāraprasave nābhyāmacchinnāyāṃ gur̤atilahiraṇyavastragodhānyādipratigraheṣvadoṣastadahastveke kurvvata iti
sarvveṣāṃ sakulyānāṃ dvipadacatuṣpadī dhānyāni hiraṇyāni
dadyāt
aśaucamadhye'pyetatkāryyamityāha
prajāpatiḥ
aśauce tu samutpanne putrajanma yadā bhavet
karttustātkālikī śuddhiḥ pūrvvāśaucena śudhyati || iti
yattu jyotiḥśāstre
mṛdudhruvakṣipracareṣu bheṣveṣāmudaye'pi vā
gurau śukre'thavā kendre jātakarma ca nāma vā || iti
tadvaivājjātakarmanāmakaraṇotkarṣe veditavyam | anutkarṣe tu
nāyaṃ niyamaḥ | nityasnānottarabhāvitvānnaimittikasya
atha nāmakaraṇam
nāmadheyaṃ daśamyāntu dvādaśyāṃ vāsya kārayet
puṇye tithau muhūrtte vā nakṣatre vā guṇānvite
ahanyekādaśe nāmeti
nāmadheyandaśamyāntu kecidicchanti pārthiva
dvādaśyāmapare rātrau māse pūrṇe tathā pare