Nrisimhaprasada p108

p108

atra bhūgrahaṇenaiva siddhe punargrahavacanaṃ prativāsaraṃ tasya mārjanalepaprāptyartham | tathā manurapi— “sammārjanenāñjanena sekenollekhanena ca | gavāṃ ca parivāsena bhūmiḥ śuddhyati pañcadhā” iti | mārjanādikaṃ tu sarvaduṣṭatvahetubhiḥ punaḥ punarupahatabhūmiśuddhyāpādakam | anyathopahatayanurūpaṃ mārjanādi anekaprakāramadhye dvitrādikaṃ yathāyogyaṃ śuddheḥ kāraṇam | tasmādevaṃ saptabhiḥ pañcabhirvā prakāraiḥ bhūmiśuddhiḥ kartavyeti vṛttam | bhūmeraśuddhyāpādakāni tāvadanekāni santi, tathāhi—jananamaraṇacāṇḍālādhiṣṭhānamūtrapūrīṣaśvaśūkarakharoṣṭrasparśakeśāsthibhasmaprabhṛtīni | “yatra prasūyate nārī, mriyate dahyate'thavā | cāṇḍālo'dhyuṣito yatra yatra mūtrādisaṅgatiḥ || evaṃ kalmaṣabhūyiṣṭhā bhūramedhyā prakīrtitā | śvaśūkarakharoṣṭrādyaiḥ saṃspṛṣṭā duṣṭatāṃ vrajet || aṅgāratuṣakeśāsthi bhasmādyairmalinā bhavet” iti | tatra “pañcadhā vā caturdhā vā bhūramedhyā viśuddhyatī”ti vākyoktā amedhyāyā bhūmeḥ śuddhiḥ | cāṇḍālādhyuṣitāyā bhūmergandhārdratāpanayanadahanakālagokramaṇasekollekhanaiḥ śuddhatā | yatra manuṣyā jāyante mriyante vā sā'tyantaduṣṭā dāhātiriktaiścaturbhiḥ śuddhyati | devalaḥ— “pañcadhā vā caturdhā vā bhūramedhyā viśuddhyati | duṣṭā tridhā dvidhā vāpi śuddhyate mallinaikadhe”ti vākyāt | gokramaṇāsekollekhanaiḥ śuddhā syāt, malinā tu bhūmirullekhanenaikena śuddhā bhavati iti