Nrisimhaprasada p160.1

p160.1

pi smaryate | yathā— “sindhusauvīrasaurāṣṭrān tathā pratyantavāsinaḥ | aṅgavaṅgakaliṅgādyān gatvā saṃskāramarhatī”ti || punaḥsaṃskāra karmāṇi ye grāhyā dharmā ye ca tyājyāste'bhihitāḥ– “mekhalāmajinaṃ daṇḍamupavītaṃ kamaṇḍalum | nivartante dvijātīnāṃ punaḥ saṃskārakarmaṇī”ti || deśāntaragamananiṣedho dṛṣṭārtha eva niṣidhyate nādṛṣṭārthastīrthayātrānibandhanaḥ | “dṛṣṭārthagamane doṣastīrthārthaṃ na duṣyati | na jātu deśadoṣo'sti tīrthe kṣetre ca daivate” iti smaraṇāt | ata evāhurrṣayaḥ– “kīkaṭeṣu gayā puṇyā puṇyaṃ rājagṛhaṃ vanami”ti | vāyupurāṇe— “triśaṅkuṃ varjayeddeśaṃ sarvaṃ dvādaśayojanam | uttareṇa mahānadyā dakṣiṇena tu kīkaṭān || deśastraiśaṅkavo nāma śrāddhakarmaṇi garhitaḥ” iti | tathā — “kāraskarāḥ kaliṅgāśca sindhoruttaratastathā | praṇaṣṭaśrāddhakarmāṇo deśā varjyāśca yatnataḥ” || pranaṣṭaṃ śrāddhakarma yeṣu deśeṣu te pranaṣṭaśrāddhakarmāṇaḥ | “saṅkīrṇāniṣṭaśabdāṃ ca jantuvyāptāṃ sakardamām | pūtigandhāṃ tathā bhūmiṃ varjayecchrāddhakarmaṇi” || ruditākranditā'ślīlādyaniṣṭaḥ śabdo yasmindeśe sā bhūmiraniṣṭaśabdeti kathyate | yamaḥ— “gogajāśvādipṛṣṭheṣu kṛtrimāyāṃ tathā bhuvi | āpadyapi ca kaṣṭāyāṃ na kuryātpitṛtarpaṇam” || gavāśvādipṛṣṭheṣviti tadyuktaratheṣu | agnau tiṣṭhatītivattatrāsaṃbhavāt | pitṛtarpaṇaṃ śrāddhakarma | kṛtrimā dvitryādibhūmiḥ | tathā parabhūmiṣu aniṣiddhāsvapi śrāddhaṃ nānuṣṭheyam | “pārakyabhūmibhāge tu pitṝṇāṃ nirvapettu yaḥ | tadbhūmipitṛbhiḥ sarvaṃ tasya karma vihanyate” ||