Nrisimhaprasada p160.2

p160.2

tasya śrāddhakartuḥ tadbhūmisvāmikaiḥ pitṛbhirvihanyate ityarthaḥ | “tasmācchrāddhāni karmāṇi puṇyeṣvvāyatane ṣu ca | nadīṣu devakhāteṣu svabhūmau ca prayatnataḥ” || tataścāyaṃ śāstrārthaḥ | parasattākāsu bhūmiṣu kiñcidvittādi datvā svasattāmāpādya śrāddhādyanuṣṭheyamiti | kvacitparakīyatvamapi nāsti tadāha saṃgrahakāraḥ— “aṭavyaḥ parvatāḥ puṇyāḥ nadyastīrthāni yāni ca | sarvāṇyasvāmikānyāhurnahi teṣu parigrahaḥ” || iti śrīmallakṣmīnṛsiṃhacaraṇayugalaśaroruhabhramarasakalabhūmaṇḍalapragaṇḍa samastayavanādhīśvaraśrīnikāmasāhasamastasāmrājyadhurandharaśrīmahārājādhirājaśrīdalapatirājaviracite śrīnṛsiṃhaprasāde śrāddhasāre deśanirūpaṇam | atha śrāddhakālāḥ | te cāmāvasyāṣṭakādayaḥ | tadāha yogī— "amāvāsyā'ṣṭakādviḥ duḥkhāpattau'yanadvayam | dravyaṃ brāhmaṇasampattirviṣuvatsūryasaṅkramaḥ || vyatīpāto gajacchāyā grahaṇaṃ candrasūryayoḥ | śrāddhaṃ prati ruciścaiva śrāddhakālāḥ prakīrtitāḥ" iti | yasyāṃ tithau candramā na dṛśyate sā'māvasyā tatra śrāddhaṃ nityamāvaśyakamiti yāvat | "śrāddhaṃ kuryādavaśyaṃ tu pramītapitṛko dvijaḥ | indukṣaye māsi māsi vṛddhau pratyahameva ceti" laugākṣismaraṇāt | indukṣayo'māvāsyā, aṣṭakāścatasraḥ mārgaśīrṣādimāsacatuṣṭayāparapakṣāṣṭamyaḥ | tathā''śvalāyanaḥ— "hemantaśiśirayoścaturṇāmaparapakṣāṇāmaṣṭamīṣvaṣṭakā" iti | nanu dvādaśa paurṇamāsyo dvādaśāṣṭakā dvādaśāmāvāsya iti vacanātkathaṃ catasro'ṣṭakā ityabhihitaṃ, satyam, ekaikasminmāsi tisrastisraḥ sampadyante iti dvādaśaparipūtirabhyupeyate | aṣṭamīgrahaṇena sannidhānātsaptamīnavamyorgrahaṇm |