Nrisimhaprasada p164

p164

"prauṣṭhapadādyaparapakṣe māsi caiva mi" ti śaunakasmaraṇāt | tathā''pastambo'pi"sarveṣvevāparapakṣeṣu śrāddhe kriyamāṇe pitṝṇāṃ prītiḥ, kartustu kālaniyamātphalaviśeṣaḥ | prathame'hani kriyamāṇe strīprāyamapatyaṃ jāyate, dvitīye strīṇām, tṛtīye brahmavarcasaṃ, caturthe kṣudrapaśavaḥ, pañcame pumān , ṣaṣṭhe'dhvaśīlo'kṣaśīlaśca, saptame kṛṣerāptiḥ, aṣṭame puṣṭiḥ, navame ekakhuram , daśame vyavahārasiddhiḥ, ekādaśe kṛṣṇāyasaṃ trapusīsaṃ, dvādaśe paśumān , trayodaśe bahumitro darśanīyāpatyo bhavati, caturdaśe āyudhasiddhiḥ, pañcadaśe puṣṭiḥ" | nabhasye kṛṣṇapakṣapratipatprabhṛti pañcadaśa dināni kṛtsnaśo'pi pakṣaḥ kanyāgate savitari mahālaya ityucyate | tatra ca śrāddhaṃ pārvaṇavidhinaiva kartavyam | taduktaṃ vṛddhamanunā"nabhasyasyāparaḥ pakṣo yatra kanyāṃ vrajedraviḥ | sa mahālayasaṃyukto gajacchāyāhvayastathā" iti | "nabhasyasyāpare pakṣe tithaṣoḍaśakaṃ tu yat" iti śāṅkhāyanavacanaṃ dinavṛddhyabhiprāyeṇa, anyathā tasya tyājyatvāpatteḥ | athavā pradipadamārabhya pratipadi samāptiḥ, pratipado'pi naṣṭacandratvāt | athavā paurṇamāsyāmārabhyāmāyāṃ samāptiriti | tataśca dvādaśakapāleṣu aṣṭākapālavat ṣoḍaśadivaseṣu pañcadaśadinavacanamavayutyānuvādo bhaviṣyati | athavā pañcadaśaṣoḍaśadinayorvikalpaḥ | kanyāsthārkaḥ prāśastyāyaiva"kanyāgate savitari śrāddhaṃ kurvīta sarvathā