Nrisimhaprasada p165

p165

āṣāḍhyāḥ pañcamaḥ pakṣaḥ praśastaḥ pitṛkarmaṇi" iti jābālismaraṇāt | "putrānāyustathā''rogyamaiśvaryamatulaṃ tathā | prāpnoti pañcame datvā śrāddhaṃ kāmāṃśca puṣkalān" iti ṣaṭtriṃśanmatavacanāt | darśagrahaṇaṃ śuklakṛṣṇaikādaśyoḥpakṣastṛtyārtham | "śrāddhavighne samutpanne tvavijñāte mṛte'hani | ekādaśyāntu kurvīta kṛṣṇapakṣe viśeṣata" iti marīcismaraṇāt | atraivamanvayaḥ-yā kṛṣṇapakṣaniṣṭhaikādaśī tasyāṃ viśeṣataḥ kartavyamiti, yataḥ pitṛkārye kṛṣṇapakṣasyaiva viśeṣeṇa grāhyatvāt | kṛṣṇaikādaśīto'pi amāvāsyāyāṃ phalaviśeṣaḥ śrūyate | mārkaṇḍeyaḥ"pratipaddhanalābhāya dvitīyā hi prajāpradā | varārthinī tṛtīyā ca caturthī śatrunāśinī || śriyaṃ prāpnoti pañcamyāṃ ṣaṣṭhyāṃ pūjyo bhavennaraḥ | gaṇādhipatyaṃ saptamyāmaṣṭamyāṃ buddhimūttamām || śivaṃ navamyāṃ prāpnoti daśamyāṃ pūrṇakāmatām | vedāṃstathā''pnuyāt sarvān ekādaśyāṃ kriyāparaḥ || dvādaśyāṃ hemalābhaṃ tu prāpnoti pitṛpūjakaḥ | prajñāṃ medhāṃ paśuṃ puṣṭiṃ svātantryaṃ vṛddhimūttamām || dīrghamāyurathaiśvaryaṃ kurvāṇastu trayodaśīm | avāpnoti na sandehaḥ śrāddhe śrāddhaparo naraḥ || yuvānaḥ pitaro yasya mṛtāḥ śastreṇa vai hatāḥ | tena kāryaṃ caturdaśyāṃ teṣāṃ tṛptimabhīpsatām || śrāddhaṃ kurvannamāvāsyāṃ yatnena puruṣaḥ śuciḥ | sarvān kāmānavāpnoti svarge vāsaṃ samaśnute"