Nrisimhaprasada p184.5

p184.5

naimittike kāmakālau evaṃ sarvatra kīrtayet” | naimittikaṃ sapiṇḍīkaraṇam | “dattvā''sanaṃ tato daive kāmakālau sadaiva hī”ti smṛteḥ | tadutpattiḥ śrūyate— “dakṣasya duhitā sādhvī viśvā nāma pariśrutā | tasyāḥ putrā mahātmāno viśvedevā iti smṛtāḥ | guruṇā tu daśa prakāratā'bhihitā— “kraturdakṣo vasuḥ satyaḥ kālaḥ kāmastathaiva ca | dhūrī tathā locanaśca tathā caiva purūravāḥ || ārdravāśca daśaivaime viśvedevāḥ prakīrtitāḥ” iti | karmāṅgaṃ śrāddham— “niṣekakāle some ca sīmantonnayane tathā | jñeyaṃ puṃsavane śrāddhaṃ karmāṅgaṃ tacca vṛddhivat” iti pāraskareṇābhihitam | nāndīmukhaṃ vṛddhiśrāddham | “putrajanmavivāhādau vṛddhiśrāddhamudāhṛtam”ti vṛddhavaśiṣṭhasmaraṇāt | ādiśabdaḥ annaprāśanacūr̤ākaraṇādisaṃskāraparigrahārthaḥ | phalakāmanopādhikaṃ kāmyam | pārvvaṇamamāvāsyāśrāddham | naimittikaṃ sapiṇḍīkaraṇam | atrāyamāsanādau prayogaḥ | tatra smṛtiḥ | “akṣayyāsanayoḥ ṣaṣṭhī caturthī cāsane matā | arghye'vanejane piṇḍe tathā pratyavanejane || sambuddhyantāni kurvīta śabdaśāstraviśāradaḥ” | āsane ṣaṣṭhī, caturthyā deśaparatvena vā vyavasthayā vikalpaḥ— vyāsastu viśeṣamāha— “caturthī tvāsane nityaṃ saṅkalpe ca vidhīyate | prathamā tarpaṇe proktā sambuddhimapare jaguḥ” iti | bṛhatpracetāḥ— “gotraṃ svarāntaṃ kurvīta gotrasyākṣayyakarmaṇi | gotrastu tarpaṇe proktaḥ kurvvannevaṃ na muhyati | gotraśabdasya svarāntatā'tra pārvvaṇaviṣayā eva na sarvatra | “sarvatraiva pitaḥ proktaḥ pitā tarpaṇakarmaṇi | piturakṣayyakāle tu tatra bhrāntirna vidyate” iti |