Nrisimhaprasada p184.6

p184.6

atrāyamanuṣṭhānakramaḥ—ādāvāsanam , tataḥ kṣaṇadānam, tata āvāhanādi | taduktaṃ saṃgrahakṛtā — “tatpunarapo dattvā nimantrayedi”ti | nimantraṇaṃ ca aṅguṣṭharahitahastaṃ gṛhītvā deyam— “niraṅguṣṭhaṃ gṛhītvā ca viśvāndevānsamāhvayedi”ti purāṇavacanāt | niraṅguṣṭhaṃ hastaṃ gṛhītvā nimantrya viśvāndevānāvāhayediti vākyārthaḥ | athavā ādau āmantraṇaṃ tata āsanam , tata āvāhanādi | tatrāha yājñavalkyaḥ— “pāṇiprakṣālanaṃ kṛtvā viṣṭarārthaṃ kuśānapi | āvāhayedanujñāto viśve devāsa ityṛcā” iti | ayamāśayaḥ | adbhiḥ pāṇisaṃśodhanaṃ vidhāya kuśānapi pāṇau dattvā daive dakṣiṇaṃ jānvālbhya pitrye ca savyaṃ jānvālbhya daive kṣaṇaḥ kriyatāmiti yajamānenokte tatheti brāhmaṇenokte prāpnotu bhavāniti yajamānenokte prāpnavānīti brāhmaṇenokte ekaikaṃ kuśamāsane ekaikaṃ pādayoriti brāhmaṇo viniyogaṃ kuryāt | “nidhāya vā darbhavaṭūnāsaneṣu samāhitaḥ | praiṣānupreṣasaṃyuktaṃ vidhānaṃ pratipādayedi”ti devalasmaraṇāt | atrotikartavyatā yamasmṛtyuktā— “yavahastastato devān vijñāpyāvāhanaṃ prati | āvāhayedanujñāto viśve devāsa ityṛcā” iti