Nrisimhaprasada p192.2

p192.2

evamāsanadānaprabhṛtyācchādanaparyantaṃ vaiśvadevikārcanaṃ kāṇḍānusamayena vidhāya āsanaprabhṛtyācchādanaparyantaṃ prācīnāvītyapasavyena kuryāt | “apasavyaṃ tataḥ kṛtvā pitṝṇāmapradakṣiṇam” iti yājñavalkya smaraṇāt | tathā— “udaṅmukhastu devānāṃ pitṝṇāṃ dakṣiṇāmukhaḥ | pradadyātpārvaṇe sarvaṃ daivapūrvaṃ vidhānataḥ” iti śātātapasmaraṇāt | tasmādvaiśvadevikamāsanācchādanāntaṃ karmakalāpaṃ kāṇḍānusamayena vidhāya paitṛkamāsanādyācchādanāntaṃ karma kartavyamiti siddham | nanu daive pitrye ca āsanaprabhṛtyācchādanaparyantānāṃ padārthā nāṃ padārthānusamayenānuṣṭhānaṃ sambhavati, kasya hetoḥ kāṇḍānusamayenānuṣṭhānamaṅgīkriyate | padārthānusamayena hi pradhānapratyāsattisteṣāṃ bhavet vaiṣamyābhāvaśca | evamanaṅgīkāre hi keṣāṃ cit pradhānapratyāsattiḥ keṣāṃ citpradhānāpratyāsattiriti | atrābhidhīyate— āsanāvāhanārghyādipadārtheṣu kāṇḍānusamaya evābhyupeyate vacanabalāt | spaṣṭamatra “apasavyaṃ tataḥ kṛtve”ti vācanikatvaṃ tato vaiśvadevikāsanādipadārthānāṃ kāṇḍānusamayānuṣṭhāne pitrarcanavidhāvapi kāṇḍānusamaya eva jyāyān | tataḥ pitryādīnāṃ ca trayāṇāmayugmān kuśān dviguṇābhugnān pradakṣiṇaṃ vāmato viṣṭarārthamāsaneṣūdakapūrvaṃ dadyāt , tataḥ punarudakaṃ dadyāt | tathā cāhāśvalāyanācāryaḥ“apaḥ pradāya dviguṇābhugnān kuśān kṛtvā apaḥ pradāye”ti | idaṃ vaiśvadevike pitrye ca karmaṇi ādyantayorudakadānaṃ ca pratipadārthaṃ draṣṭavyam |