Nrisimhaprasada p192.3

p192.3

tata āsanānantaraṃ prācīnāvītaṃ vidhāya satilān dviguṇadarbhānnādāya śrāddhe kṣaṇaḥ kriyatāmiti kṣaṇaṃ datvā savyaṃ jānvā labhya dvitīyāvibhaktyā bahuvacanāntagotraśabdaṃ samuccārya tathaiva brāhmaṇāmānyuccārya pitṝn pitāmahān prapitāmahān iti brāhmaṇānāmājñāṃ pṛṣṭvā āvāhayeti brāhmaṇairanujñātaḥ uśantastveti nidhīmahītyetayarcā āvāhanaṃ vidhāya āyantu naḥ pitara iti mantreṇopasthāya apahatā ityanena apradakṣiṇaṃ tilān vikiret | chandogāstu jānuvisarjanānantaraṃ etaddhaḥ pitaraḥ somyāsa ityādi japtvā śeṣaṃ pūrvavatkuryuḥ | tata āvāhanānantaramarghyādikaṃ kuryāt | pātrāsādanaṃ ca viṣṇūktarītyā, dakṣiṇāpavargaṃtayā''pāditeṣu pavitrāntarhiteṣu triṣvapi pātreṣu śanno devīrabhiṣṭaya iti mantreṇa pratipātramudakamāsiñcet | pātrāṇi cārghyabrāhmaṇabahutve'pi devatāsaṅkhyayā trīṇyeva | “stīrtvā pitṝṇāṃ trīṇyeva kuryāt pātrāṇi dharmavit | ekasmin vā bahuṣu vā brāhmaṇeṣu yathāvidhi” iti | stīrtvā arghyodake tilān kṣiptvā ityarthaḥ | arghyapavitrāṃ yugmasaṃkhyayā kartavyam | taduktam— “pitṛpātre viśeṣo'yaṃ tilo'sīti tilān kṣipet | tisraḥ tisraḥ śalākāstu pitṛpātreṣu pārvaṇe || ekoddiṣṭe śalākaikāṃ nighāyodakamāharet | sarvadaiva hi kartavyaṃ pitṝṇāṃ ca tilodakam || tāmrapātreṇa kartavyamanyathā hi vṛthā bhavedi”ti | arghārthāyopastambaḥ — “gandhādibhiḥ pūjyāḥ, tatraikadarbhaśalākānidhānaṃ, tilo'si pitṛdevatyo gosava iti mantreṇa tilāvapanam | arcanaṃ śiraḥ prabhṛti pādaparyantam” | “śirastaḥ pādato yāvat samyagabhyarcya saṃyataḥ |