Nrisimhaprasada p211.1

p211.1

"ucchiṣṭaireva vikiraṃ sadaiva pratipādayet | anyathā kurute yastu nirāśāstasya devatāḥ” iti ādya eva yuktaḥ | tato brāhmaṇahaste gaṇḍūṣārthaṃ sakṛtsakṛdapo dadyāt | tathā pitṛbrāhmaṇapūrvaṃ gaṇḍūṣādyarthamudakaṃ deyam | atra ādau hastaprakṣālanaṃ vā gaṇḍūṣaṃ veti sandehe hastaprakṣālanātpūrvaṃ gaṇḍūṣagrahaṇe ucchiṣṭabhakṣaṇāpatteḥ pūrvaṃ hastaprakṣālanamiti pūrvapakṣe prāpte siddhānto'bhidhīyate pūrvaṃ gaṇḍūṣamiti | na ca hastasthitocchiṣṭabhakṣaṇa iti vācyam | tadapekṣayā mukhasthitasya duṣṭatvāt uttarāpośānātirekeṇa mukhasthitasya rudhiratulyatvāt | ata evātiśiṣṭāviprakarṣadhiyā tatraivācamanakarma kurvanti na dūre | tataḥ pūrvaṃ gaṇḍūṣamiti | "hastaṃ prakṣālya yaścāpaḥ pibed bhuktvā dvijaḥ sadā | tadannamasurairbhuktami”ti smṛteḥ| tato'prakṣālitakara eva hastadhāvanagaṇḍūṣānantaraṃ tṛptipraśna ityapare vadanti | vacanaṃ ca pūrvaṃ pitṝṇāṃ tato devānāmityapi | “vaiśvadevaniviṣṭānāṃ carasaṃ hastadhāvanami”ti smaraṇāt | atha piṇḍanirvapaṇamabhidhīyate | atra piṇḍapitṛyajñakalpātideśena caruśrapaṇāsadbhāve agnaukaraṇāśiṣṭacaruśeṣeṇa saha sarvamannamupādāyāgnisannidhau piṇḍāndadyāt | caruśrapaṇābhāve agnaukaraṇāvaśiṣṭaṃ yat sārvavarṇikamannaṃ tatsarvamupādāya tilamiśraṃ dakṣiṇāmukha ucchiṣṭasannidhau piṇḍān dadyāt | tadāha yogī:— "sarvamannamupādāya satilaṃ dakṣiṇāmukhaḥ | ucchiṣṭasannidhau piṇḍān dadyādvai pitṛyajñavat" | tatra pracetā:— "aratnimātramutsṛjya piṇḍāṃstatra pradāpayet | athopaspṛśyatāṃ vāpi prāpnuvanti na vindata" iti |