Nrisimhaprasada p211.2

p211.2

atra dvau pakṣau vāgurisammatau— "baddhamuṣṭikaro'ratniraratnirakaniṣṭhika" iti | bhāskaro'nyathāha— "pātrāṇāṃ bāhumātreṇa piṇḍadānaṃ vidhīyate | karābhyāmullikhet sphyena kuśairvāpi mahīṃ dvijaḥ" ayaṃ tṛtīyaḥ | atra caturthaḥ— "pitṛbrāhmaṇataḥ sthānādagratastriṣvaratniṣu | ucchiṣṭaṃ tadvijānīyānnocchiṣṭāsanasannidhau" iti | eteṣu caturṣvapi pakṣeṣu madhye deśakālādyapekṣayā vyavasthā | atriḥ— "pitṛṇāmāsanasthānāt agratastriṣvaratniṣu" iti | atra pakṣadvayam pūrvameva piṇḍadānamityeke bhojanottaramiti dvitīyam | "piṇḍanirvapaṇaṃ kecit purastādeva kurvate | bhuñjāneṣu tu vipreṣu bhuktavatsu tathā'para" iti smaraṇāt | śākhāpekṣayā vikalpaḥ | tatrāpraśasteṣu śrāddheṣu pūrvaṃ, praśasteṣūttaram | atra navaśrāddhaprabhṛtīnyapraśastāni, sāṃvatsarikāparapakṣādīni praśastāni | tṛptāparakālakarttavyatāyāmapi dvaidham, ācamanāt pūrvamūrdhvaṃ veti | āśvalāyanaśākhināṃ tu ubhayapakṣe vikalpaḥ | “bhuktavatsu anācānteṣu teṣu piṇḍānnidadhyādācānteṣu ve”ti āśvalāyanasmaraṇāt | tatprakāro brahmāṇḍe'bhidhīyate— “savyottarābhyāṃ pāṇibhyāṃ kuryādullekhanaṃ dvijaḥ | pragharṣaṇaṃ tataḥ kuryācchrāddhakarmaṇyatandritaḥ | kaṇḍanaṃ peṣaṇaṃ caiva tathaivollekhanakriyā | vajreṇātha kuśairvāpi ullikhettu mahīṃ dvijaḥ” iti | taṇḍulādeḥ kaṇḍanaṃ, śākādeśchedanaṃ, peṣaṇaṃ taṇḍulādeḥ, bhuvaḥ karṣaśāmapahatā iti mantreṇa ullekhanam | atra mantraḥ kātyāyanena darśitaḥ— “asāvetatta iti ye ca tvāmanviti caika iti” |