Nrisimhaprasada p26

p26

“anyāyopārjitairarthaiḥ yacchrāddhaṃ kriyate naraiḥ | tṛpyanti tena cāṇḍālapulkasādyāsu yoniṣu || gatapāpā viśuddhyanti brāhmaṇyamupayānti te | brāhmaṇānāṃ tathaivānye na tṛptiṃ prāpyanti vai (taiḥ) || piśācatvamanuprāpya kṛmikīṭatvameva ca | evaṃ ye yajamānasya yacca teṣāṃ dvijanmanām || kaścijjalādivikṣepaḥ śucirucchiṣṭameva vā | tenānyena prakāreṇa tattadyonyantaraṃ gatāḥ || prayāntyāpyāyanaṃ vatsa? samyakśrāddhakriyāvatām” | iti | tathā nāgarakhaṇḍe— “śrāddhe tu kriyamāṇe vai na kiñcidvyarthatāṃ vrajet | ucchiṣṭamapi, rājendra tasmācchrāddhaṃ samācaret” || evaṃ śrāddhakriyādvārā śrāddhapraśaṃsā'bhihitā | idānīṃ pitṛrūpadevatāprasaṅgena śrāddhapraśaṃsā'bhidhīyate— vāyupurāṇe— “ityete pitarastāta devānāmapi devatāḥ | prajāpatimukhā hyete sarveṣāṃ tu mahātmanām || ādyo gaṇastu yogānāṃ sa nityaṃ yogavardhanaḥ | dvitīyo devatānāṃ ca tṛtīyo devavairiṇām || śeṣāstu barhiṣāṃ jñeyā iti sarve prakīrtitāḥ | devāstvetānyajante vai sarveṣveva vyavasthitān || āśramāstu yajante tān catvārastu yathākramam | varṇāścaiva yajante tān catvāraśca yathāvidhi || yathā saṅkarajātāśca mlecchāścaiva yajanti vai | sadā vai pitaraḥ pūjyāḥ sraṣṭāro deśakālayoḥ || pitṛbhaktyā tato nityaṃ yogaṃ prāpnotyanuttamam | yogena mokṣaṃ labhate hitvā karma śubhāśubham || yajñahetoryaduddhṛtya mohayitvā jagattadā | guhāyāṃ nihito yogaḥ kāśyapena mahātmanā || taṃ ca yogaṃ samāsena pitṛbhaktastu kṛtsnaśaḥ