Nrisimhaprasada p27

p27

ayatnāt prāpnuyājjantuḥ sarvathaiva na saṃśayaḥ || yāni ratnāni medinyāṃ vāhanāni striyastathā | kṣipraṃ prāpnoti tatsarvaṃ puruṣaḥ śrāddhakṛttathā || vidyārthī prāpnuyādvidyāṃ putrārthī putramāpnuyāt | rājā tu labhate rājyamadhanaścottamaṃ dhanam || kṣīṇāurlrbhate cāyuḥ pitṛbhaktyā sadā naraḥ” || iti | brahmavaivartapurāṇe— “nahi yogagatiḥ sūkṣmā na pitṝṇāṃ parāgatiḥ | tapasāpi na dṛśyā'sau kiṃ punarmāṃsacakṣuṣā || catvāraḥ pitaro mūrtā mūrtihīnāstrayastathā | teṣāṃ śrāddhāni satkṛtya devāḥ kurvanti yatnataḥ || bhaktāḥ prāñjalayaḥ sarve sendrāstadgatamānasaḥ | viśve ca vasavaścaiva pṛśninaḥ śṛṅgiṇastathā || kṛṣṇāḥ śvetāstvajāścaiva vidhivatpūjayantyuta | prajātā vātarasanā divākṛtyāstathaiva ca || meghāśca marutaścaiva brahmādyāśca divaukasaḥ | atribhṛgvaṅgirādyāśca ṛṣayaḥ sarva eva ca || yakṣā nāgāḥ suparṇāśca kinnarā rākṣasaiḥ saha | pitṝṃste'pūjayan sarve nityameva phalārthinaḥ || evamete mahātmānaḥ śrāddhe satkṛtya pūjitāḥ | sarvān kāmānprayacchanti śataśo'tha sahasraśaḥ || hitvā trailokyasaṃsāraṃ jarāmṛtyubhayaṃ tathā | mokṣaṃ yogamathaiśvaryaṃ sūkṣmadehaṃmadehatām || kṛtsnaṃ vairāgyamānantyaṃ prayacchanti pitāmahāḥ | variṣṭhaḥ sarvadharmāṇāṃ mokṣadharmaḥ sanātanaḥ || pitṝṇāṃ hi prasādena prāpyate sumahātmanā | āyuḥ putrān dhanaṃ vidyāṃ svargaṃ mokṣaṃ sukhāni ca || rājyaṃ cāpi prayacchanti prītāḥ pitṛgaṇā nṛpa ? | ratiśaktiḥ striyaḥ kāntā bhojye bhojanaśaktitā || dānaśaktiḥ svavibhavā rūpamārogyameva ca | śrāddhapuṣpamidaṃ proktaṃ phalaṃ brāhmaṇasaṅgamaḥ || śrūyate hi purā mokṣaṃ prāptāḥ kauśikasūnavaḥ | pañcabhirjanmasambandhaiḥ prāptā brahmapadaṃ param || kauśiko nāma dharmātmā kurukṣetre mahārṛṣiḥ | nāmataḥ karmataścāsya sutān sapta nibodhata || svasṛmaḥ krodhano hiṃsraḥ piśunaḥ kavireva ca | vāgduṣṭaḥ pitṛvarttī ca gargaśiṣyāstadā'bhavan || pitaryuparate teṣāmabhūd durbhikṣamulbaṇam | anāvṛṣṭiśca mahatī sarvalokabhayaṅkarī || gārgādeśādvane dogdhrīṃ rakṣantaste tadā dvijāḥ | hanāmaḥ kapilāmekāṃ vayaṃ kṣutpīḍitā bhṛśam || iti cintayatāṃ teṣāṃ laghu prāha tadā'nujaḥ | athāñbabhyamiyaṃ vadhyā śrāddharūpeṇa yojyatām || śrāddhe niyojyamāneyaṃ pāpāt trāsyati no dhruvam | evaṃ kurvityanujñātaḥ pitṛvartī tadā'grajaiḥ || cakre samāhitaḥ śrāddhamālabhya kapilāṃ sa tām | dvau deve bhrātarau kṛtvā pitrye trīṃścāparān kramāt || tathaikamatithiṃ kṛtvā śrāddhadaḥ svayameva tu | cakāra mantravacchrāddhaṃ smaran pitṛparāyaṇaḥ | tayā gavā viśaṅkāste gurave vai nyavedayan || vyāghreṇa nihitā dhenurvatso'yaṃ pratigṛhyatām | evaṃ sā bhakṣitā dhenuḥ saptabhistaistapodhanaiḥ || vaidikaṃ balamāśritya krūre karmaṇi nirbhayaiḥ | tataḥ kālāpakṛṣṭaste vyādhā dāśapure'bhavan || jātā vyādhā daśārṇeṣu sapta dharmavicakṣaṇāḥ | jātismarāḥ sapta mṛgā jātāḥ kālañjare girau” | iti