Nrisimhaprasada p48

p48

tathā brahmāṇḍapurāṇe— “śikhibhyo dhāturaktebhyastridaṇḍibhyaśca dāpayet” iti | brahmacāriṇaḥ śikhinaḥ, dhāturaktāḥ dhāturaktavastradhāriṇo vanasthāḥ | tatra pūrvaṃ yatiḥ śreṣṭhaḥ, tato vānaprasthaḥ, tato brahmacārī, tato gṛhastha iti | tadāha nāradaḥ— “yo vai yatīnanādṛtya bhojayeditarān dvijān | viduṣo vasato grāme kathaṃ tadyāti rākṣasān” iti | grāme svagrāme vasato yatīn teṣāmanādareṇa ya itarān dvijān bhojayet tadīyaṃ kavyaṃ pitrarthaṃ saṅkalpitamapi rākṣasāneva yātīti bhāvaḥ | tathā ca brahmāṇḍapurāṇe— “alābhe'pyatitikṣūṇāṃ bhojayed brahmacāriṇam | tadabhāve hyudāsīnaṃ gṛhasthamapi bhojayet” iti | tathā pitṛgāthā śrūyate— “api syātsa kule janturbhojayedyastu yoginam | vipraśrāddhaṃ prayatnena tena tṛpyāmahe vayam” iti | yaḥ prayatnena bhojayedityādarārtham | tathā ca purāṇam— “gṛhasthānāṃ sahasreṇa vānaprasthaśatena ca | brahmacārisahasreṇa yo yogī sa viśiṣyate” iti | tathā ca padmapurāṇe— “sāṅgāṃstu caturo vedān adhīte samyagarthavit | janmavān karmasaṃśuddhaḥ sa śrāddhe prathamo mataḥ” iti