Prataparka 2.p77

2.p77

hemādrau kātyāyanaḥ—“pitṛmātṛbhrātṛpatigurvarthe ca viśeṣataḥ | upavāsaṃ prakurvāṇaḥ puṇyaṃ śataguṇaṃ labhet || dakṣiṇā nātra dātavyā śuśrūṣā vihitā hi sā |” madanaratne prabhāsakhaṇḍe—“bharttā putraḥ purodhāśca bhrātā patnī sakhā'pi ca | yātrāyāṃ dharmakāryeṣu karttavyāḥ pratihastakāḥ || ebhiḥ kṛtaṃ mahādevi svayameva kṛtaṃ bhavet | svayaṃ karttu maśaktaścetkārayecca purodhasā |” dakṣasmṛtau—“svayaṃ home phalaṃ yatsyānna tadanyena jāyate | ṛtvikputro gururbhrātā bhāgineyo'tha viṭpatiḥ || ebhireva hutaṃ yattu taddhutaṃ svayameva tu |” śūdrasya brāhmaṇaḥ pratinidhiryuktaḥ--‘japastapastīrthasevā pravrajyā maṃtrasādhanam | vipraiḥ sampādita yasya sampannaṃ tasya tatphalam ||” iti marīcivacanāt | yattu nirṇayasindhāvuktaṃ pravrajyādīnāṃ śūdre'sambhavānnedaṃ vacanaṃ brāhmaṇasya śūdrapratinidhitvaparaṃ kintu sampūrṇatāvācanaparam iti, tanna | pravrajyāmātrasya śūdre'sambhave'pi japādīnāṃ sambhave na tadviṣaye saṃkocāyogādetadvacanasya pratinidhiprakaraṇe pāṭhena sampūrṇatāvācanaparatvāyogācca