Prataparka 8.p117

8.p117

kārttikakṛṣṇāṣṭamī karakābhidhā mahārāṣṭraṣvanyeṣu ca prasiddhā | sā candrodayavyāpinī grāhyā | asyāmeva māthuramaṇḍalavāsibhī rādhākuṇḍe snānaṃ vidheyam | sā cāruṇodayavyāpinī grāhyā | tadabhāve sūryodayavyāpinī | kārttikaśuklāṣṭamī | tatra gopūjanādyuktaṃ nirṇayāmṛte kūrmapurāṇe"śuklāṣṭamī kārtike tu smṛtā gopāṣṭamī budhaiḥ | tatra kuryādgavāṃ pūjāṃ gogrāsaṃ gopradakṣiṇāḥ | gavānugamanaṃ kāryaṃ sarvānkāmānabhīpsitā ||" iti | iyameva kandarpakalpādiḥ | mārgaśīrṣakṛṣṇāṣṭamī bhairavāṣṭamī | asyāṃ bhairavaṃ saṃpūjya vighnaṃ nivārayedityuktaṃ kāśīkhaṇḍe"tīrthe kālodake snātvā kṛtvā tarpaṇamatvaraḥ | vilokya kālarājānaṃ nirayāduddharetpitṝn || kṛtvā ca trividhāṃ pūjāṃ mahāsaṃbhāravistaraiḥ | naro mārgasitāṣṭamyāṃ vārṣikaṃ vighnamutsṛjet ||" iti | upoṣaṇāṃ jāgaraṇe prokte | tatraiva"mārgaśīrṣāsitāṣṭamyāṃ kālabhairavasannidhau | upoṣya jāgaraṃ kurvansarvapāpaḥ pramucyate ||" iti | upoṣaṇānaṅgatvenārghyadānamapi kāryamityuktaṃ śivarahasye-- 'upoṣaṇasyāṃgabhūtamarghyadānamiha smṛtam' iti | atropavāso jāgaraṇaṃ ceti viśiṣṭaṃ pradhānam | tasyāhorātrasādhyatvena neyamaṣṭamyāmahorātrayutā pūrvaviddhā grāhyā | "aṇe1 yatra vrataṃ yacca ekamekatithau gatam | tasyāmubhayayoginyāmācarettadvrataṃ vratī ||" iti smṛteḥ | yadā tu pūrvadine sāyāhne uttarasminnapi pradoṣe tulyā | tadāpi pūrvaiva | "rudravrateṣu sarveṣu karttavyā sammukhī tithi" iti brahmavaivartāt | idamapi rudravrataṃ kālabhairavasya rudrāvatāratvāt | kecittu- "mārgaśīrṣāsitāṣṭamyā'miti kāśīkhaṇḍe'sya rātrivratatvāvagateḥ rātrivyāpinī grāhyā | dinadvaye tatra sattve rudravrateṣu sarveṣviti vacanātpūrvetyāhuḥ | anye tu nitya yātrādikaṃ kṛtvā madhyāhne saṃsthite ravau" iti upakramya tadograrūpādavānmattaḥ śrīkālabhairavaḥ āvirāsīttadā lokānbhīṣayannakhilānapīti madhyāhne bhairavotpatteḥ śrāvaṇānmadhyāhnavyāpinī grāhyeti