Smriticandrika 17.p7.2

17.p7.2

mātuḥpitāmahādisthāne'pi brāhmaṇānakatve pūrvoktaprakāreṇānnatyāgāvṛttiḥ | yadā tu pitrādīnāmeka eva brāhmaṇastadā yāvanta uddeśyāstāvato bhāgānekasmin bhājane pariviṣṭasyānnāderbuddhyā kṛtvā ekaikaṃ bhāgamekaikaṃ pitrādikamuddiśya tyajet | yadā tvatithirbhojanārthamupaviṣṭastadā taṃ gandhapuṣpādibhirarcayitvā pitṛbhyo'nnatyāgānantaraṃ asmai brāhmaṇāya viṣṇurūpāya śivarūpāya vā idamannamātṛpteḥ parivekṣyamāṇaṃ ca namo na mameti pariviṣṭamannaṃ tyajet | atra viṣṇupurāṇaṃpitā pitāmahaścaiva tathaiva prapitāmahaḥ | tṛptiṃ prayāntu te bhaktyā yanmayaitadihahṛtam || mātāmahastṛptimupaitu tasya tathā pitā tasya pitā ca yo'nyaḥ | viśve ca devāḥ paramāṃ prayāntu tṛptiṃ praṇaśyantu ca yātudhānāḥ || yajñeśvaro havyasamastakavyabhoktā'vyayātmā harirīśvaro'tra | tatsannidhānādapayāntu sadyaḥ rakṣāṃsyaśeṣāṇyasurāśca sarve || evamuktapaurāṇikaślokajapānantaraṃ laghuyamaḥannahīnaṃ kriyāhīnaṃ mantrahīnaṃ ca yadbhavet | sarvamacchidramityuktā tato yatnena bhojayet || acchidraṃ jāyatāmityadhyāhāreṇācchidrabhāṣaṇavākyaṃ pūraṇīyaṃ, sākāṅkṣatvāt | bodhāyanena tu acchidraṃ jāyatāmityevoktam | yadyapi laghuyamavacanādacchidrabhāṣaṇānantarameva bhojanapratīterāpośanahasteṣu brāhmaṇeṣu satsvācchidrabhāṣaṇaṃ kāryamiti pratibhāti, tathā'pi prāgevāpośanataḥ kāryaṃ na paścāt | yathā''ha pracetāḥāpośanakarāgrāṇāmacchidrasya ca bhāṣaṇāt | nirāśāḥ pitaro yānti devaissaha na saṃśayaḥ || kiṃ tarhi āpośanadānāntaraṃ kartavyamityukte sa evāhaāpośanaṃ pradāyātha sāvitrīṃ trijapedatha |