Smriticandrika 17.p7.3

17.p7.3

madhu vātā iti tṛcaṃ madhvityeva trikaṃ tathā || madhvityetāvāntrirāvartanīyamiti caturthapādasyārthaḥ | vyāhṛtīrjapitvā sāvitrīṃ japet, 'savyāhṛtikāṃ gāyatrīm' iti yājñavalkyasmaraṇāt | āpośanadānavidhānānnityabhojanāśritaniyamāḥ paryukṣaṇādayaḥ prāṇāhutyantā bhoktṛṇāmatrāpi santīti gamyate | ata eva kasyacidbhojananiyamasyātra pratiṣedhārthaṃ tadanuṣṭhāne doṣamāha bharadvājaḥpitṝṇāmannamādāya baliṃ yastu prayacchati | steyena brahmahā tena suvarṇasteyakṛdbhavet || pitṝṇāmannaṃ devapitrarthaṃ pariviṣṭamannam | ata eva sāmānyenoktamatriṇādatte vā'pyathavā'datte bhūmau yo nikṣipedbalim | tadannaṃ niṣphalaṃ yāti nirāśaiḥ pitṛbhirgataiḥ || baliṃ nityabhojananiyamavidhiṣūktaṃ baliṃ, bhojanātkiñcidannāgraṃ dharmarājāya vai balim | dattvā'tha citraguptāya prayataścedamūccaret || iti vihitamiti yāvat | vyāhṛtyādijapānantaraṃ yājñavalkyaḥ-'japtvā yathāsukhaṃ vācyam' iti | yathāsukhamiti padamaparipūrṇatvādānvitābhidhānāt padāntaramapekṣate | tena juṣadhvamiti padamadhyāhāryam | ata evajuṣadhvamiti te coktāssampagvidhṛtabhājanāḥ | kṛtamaunāssamaśnīyurāpośanādanantaram || iti vyāsenoktam | āpośanādanantaraṃ amṛtopastaraṇamasīti mantreṇāpaḥ pītvā tadanantaramityarthaḥ | prāṇāhutayastvaśanakriyāyāmanupraviṣṭā iti tāsāṃ karaṇe'pi samaśnīyurāpośanādanantaramityasya na kaścidvirodhaḥ | bhoktumupakrānteṣu brāhmaṇeṣu śrāddhakartuḥ kartavyamāha kātyāyanaḥ--'aśnatsu japedvyāhṛtipūrvāṃ gāyatrīṃ sapraṇavāṃ sakṛttrirvā rakṣoghnīḥ pitryamantrān puruṣasūktamapratirathamanyāni ca pavitrāṇi' iti |