Smriticandrika 17.p7.4

17.p7.4

rakṣoghnīḥ 'kṛṇuṣva pājaḥ prasitiṃ na pṛthvīm' ityādyā ṛcaḥ | pitryamantrāḥ—' udīratāmavare ' ityādayaḥ | apratirayaḥ—' āśuśśiśānaḥ ' iti sūktam | manurapi— svādhyāyaṃ śrāvayetpitrye dharmaśāstrāṇi caiva hi | ākhyānānītihāsāṃśca purāṇānyakhilāni ca || śrāvayedyajñopavītīti śeṣaḥ | apasavyena kartavyaṃ sarvaṃ śrāddhaṃ yathāvidhi | sūktastotrajapaṃ muktvā viprāṇāṃ ca visarjanam || iti jamadagnismaraṇāt | sūktastotragrahaṇaṃ bhuñjāneṣu vipreṣu yadyajjapyaṃ tasya sarvasyopalakṣaṇārtham | bṛhaspatistu mantrādijapādanyadapi kartavyamāha— bhakṣyabhojyaguṇānuktvā bhojayedbrāhmaṇān śanaiḥ | iti | bhoktāraṃ bhojayitāraṃ ca pratyāha vṛddhaśātātapaḥ— apekṣitaṃ yācitavyaṃ śrāddhārthamupakalpitam | na yācate dvijo mūḍhaḥ sa bhavetpitṛghātakaḥ || apekṣitaṃ yo na dadyācchrāddhārthamupakalpitam | kṛpaṇo mandabuddhiśca na sa śrāddhaphalaṃ labhet || na kevalaṃ śrāddhaphalālābhaḥ apitu kaṣṭatamajanmaprāptirapi | tathāca nigamaḥ— apekṣitaṃ na dadyādyaśśrāddhārthamupakalpitam | atha kṛcchrāsu ghorāsu tiryagyoniṣu jāyate || yācate yadi dātāraṃ brāhmaṇo jñānavarjitaḥ | pitarastasya ruṣyanti dāturbhokturna saṃśayaḥ