Kalanirnaya (Kalamadhaviya) 4.p58
Kālanirṇaya (Kālamādhavīya) 4.p58
- Language
- Sanskrit
4.p58
nanu, “pratipatsanmukhī kāryā”—ityanena tithi-viṣayeṇa viśeṣaśāstreṇa kuto na nirṇayaḥ,—iti cet | upavāsa-viṣayatvenāpi tasyopapatteriti brūmaḥ| nanu, madhyāhna-vyāpti-vacanamapi tithyantaraikabhakta-viṣayatvenopapādayituṃ śakyam| ataḥ,karma-viśeṣa-śāstra-tithi-viśeṣa-śāstrayoḥ samāna-balatvamiti cet | astu nāma, kinnaśchinnam| madhyāhnavyāpitvasammukhatvayoḥ pūrva-viddhāyāṃ sampādayituṃ śakyatvena virodhābhāvāt | yadātvṛttara-viddhāyāmeva madhyāhna-vyāpitvaṃ, tadā virodhaḥ,—iti cet| bāḍhaṃ, tathāpi tithi-viṣaya-viśeṣa-śāstrāt karma-viṣaya-viśeṣa-śāstraṃ prabalam | titherguṇatvāt, karmaṇaśca pradhānatvāt | tasmādevaṃvidhe viṣaye karma-kāla-vyāptyaiva nirṇetavyam