Kalanirnaya (Kalamadhaviya) 4.p64

4.p64

atha naktaṃ nirṇīyate | tacca, varāhapurāṇe dhānyavrate paṭhyate,— “mārgaśīrṣe site pakṣe pratipadyā tithirbhavet | tasyāṃ naktaṃ prakurvīta rātrau viṣṇuṃ prapūjayet”—iti | atra, naktaśabdo bhojana-paraḥ | kāla-paratve, ‘prakurvīta’—ityasyānanvayāt | na hi, kālaḥ kenacit karttuṃ śakyate | tasya bhojanasya, ‘rātrau’—iti kāla-vidhiḥ | ato divā bhojana-rahitatve sati rātri-bhojanaṃ vratasya svarūpam | anyathā, svataḥ prāptasya rātri-bhojanasya vidhāna-vaiyarthyāt | tasya ca nakta bhojanasya, viṣṇu pūjanamaṅgam, tatsannidhau paṭhitatvāt | tathā, homo'pi tadaṅgam, ‘homañca tatra kurvīta’—ityabhidhānāt | evañca sati, pradhānā-virodhena pūjā-homayoraṅgayordivā'nuṣṭhānamuktaṃ bhavati | pradhānasya ca naktasya kāla dvayaṃ bhaviṣyatpurāṇe darśitam,— “muhūrttonāṃ dinaṃ naktaṃ pravadanti manīṣiṇaḥ | nakṣatra-darśanānnaktamahaṃ manye gaṇādhipa”—iti | asya ca kāla-dvayasyādhikāri-bhedena vyavasthāmāha devalaḥ—