Kalanirnaya (Kalamadhaviya) 7.p15

7.p15

niravakāśatvābhyāṃ madhyāhna-vyāpitva-vacanamevātiprabalaṃ viddhi| vināyaka vrate tasya pratipadoktatvādapi prabalatvam| jayā-vacanantu gauryādi-vrate caritārtham| tacca vrataṃ bhaviṣyatpurāṇe'bhihitam,– "vināyakaṃ samabhyarcya caturthyāṃ yadunandana| sarva-vighna-vinirmuktaḥ kāryya-siddhimavāpnuyāt"|| ityabhidhāyānantaramidaṃ paṭhyate,— "nidrāṃ ratiṃ śivāṃ bhadrāṃ kīrttiṃ medhāṃ sarasvatīm| prajñāṃ tuṣṭiṃ tathā kāntiṃ tatraivāhani pūjayet|| vidyākāmoviśeṣeṇa pūjayecca sarasvatīm”—iti| liṅgapurāṇe'pi,— "caturthyāntu gaṇeśasya gauryyāścaiva vidhānataḥ| pūjāṃ kṛtvā labhet siddhiṃ saubhāgyañca naraḥ kramāt"—iti| nāradīyapurāṇe'pi,— "māgha-śukla-caturthyāntu gaurīmārādhayedbudhaḥ| caturthī varadā nāma gaurī tatra supūjitā”—iti| atoyathokta-rītyā vināyaka-vrate madhyāhna-vyāpitvenaiva nirṇayaḥ| gaurī-vrate tu jayā-vacanaṃ draṣṭavyam| tatra, yadā dina-dvaye'pi vaiṣamyeṇa madhyāhnakaikadeśa-vyāpinī, tadā pūrvadine tanmahattvañcet tadevopādeyam| uttaradine tanmahattve kiṃ mahattvaguṇena tadupādeyaṃ, kiṃ vā mātṛ-viddhatva-guṇena pūrva-mupādeyamiti