Nirnayakautuka 2.p28

2.p28

tathātītādardharātrāt parato vidyamāno, na tat pūrvaḥ | nāpyupākarmāṅgabhūtatithinakṣatrāpekṣayā pūrvottarakālīne tithyantare nakṣatrāntare vā vidyamānaḥ | yadā tu gauṇakāle'pyoṣadhiprādurbhāvābhāvo grahasaṃkrāntiyogo vā nimittāntareṇa kenacidatipattirvā bhavati, tadā varṣattu madhye yadā kadācit kāryaṃ na tu śrāvaṇasambandhaniyamaḥ | etāni hastaśravaṇaparvāṇi dinadvaye'pi karmakālavyāptāvavyāptau caudayikāni prātaḥ saṃgavātmakaṣaṇmuhūrttavyāpini grāhyāṇi | nirṇayasindhau tu ghaṭikādvayaparimite'pi śravaṇe upākarmoktam | yadā pūrvadine trimuhūrttādhikā vottarāṣāḍhā, upariṣṭācca śravaṇaḥ paradine kṣayavaśādudaye ca nāsti tadā pañcamyādau kāryā | na tu pūrvaviddhe śravaṇe | na hi mukhyābhāve niṣiddhamiśragrahaṇaṃ saṃbhavati | pañcamyādikālatrayāsaṃbhave tūttarāṣāḍhaviddhamapi grāhyam | evaṃ parvāpi | etacca śukrāstādāvapi kāryam | prathamyārambhastu na bhavati | prathamyārambhe tu vṛddhiśrāddhaṃ kuryāt | dvitīyādiprayogo'pyadhimāse sāmagabhinnairna kāryaḥ | idaṃ trayāṇāmapi varṇānāṃ nityam | utsarjanaṃ tu bahvṛcairmāghyāṃ kāryam | yājuṣaiḥ pauṣe rohiṇyāmaṣṭakāyāṃ vā