Nirnayakautuka 2.p39

2.p39

asyāmevāṣṭamyāṃ mahālakṣmīvratārambham | asya ca 1prathamārambhaḥ siṃhasthe sūrye satyeva kāryo, na kanyāsthe | samāptiśca navamīvedho rakherhastīttaragatatvaṃ tridinatvamavamadinatvaṃ ceti doṣacatuṣṭayarahitāyāmaṣṭamyāṃ kāryā | yasmiṃśca varṣe prārabdhasya mahālakṣmīvratasyoktaniṣedhakāle samāptiḥ prasaktā bhavati tasmin varṣe nāsyārambho vidheyaḥ | dvitīyādiprayoge sati saṃbhave' aniṣiddhakāle eva samāpanam | asatyāṃ gatau niṣiddhe'pi | vratasya ṣoḍaśābdasādhyatvena madhye tyāgāyogāt | idaṃ ca vratamaṣṭamyāḥ dvaidhe yatra jyeṣṭhāyogastatrārabdhavyam | tadasambhave kevalāyāmapi navamīyuktāyām | iyaṃ jyeṣṭhāyutā parā grāhyā | tadabhāve kevalāpīti vivecanādau | mayūkhamate tu niśīthottaravartinī | bhādraśuklaikādaśyāṃ dvādaśyāṃ vā viṣṇoraṅgaparivarttanaṃ kāryam | bhādraśukladvādaśyāṃ śravaṇayogarahitāyāṃ pāraṇaṃ kuryāt | asambhave madhyagāviṃśatināḍīstyajet | kecittu caturdhā vibhajya madhyamapādadvayaṃ tyajedityāhuḥ