Nirnayakautuka 2.p38

2.p38

sūryaṣaṣṭhī | sā saptamīviddheti divodāsaḥ | iyameva bhaumavāraviśākhānakṣatravaidhṛtiyogairyuktā campāsaṃjñā | tasyāṃ mallāreḥ pūjā darśanaṃ ca kāryam | bhādraśuklāṣṭamyāṃ dūrvāvrataṃ rohiṇasaṃjñakanavamamuhūrttavyāpinyāṃ jyeṣṭhāmūlarahitāyāṃ kāryam | atra jyeṣṭhāmūlavivarjitāyāḥ paradina eva rohiṇavyāptau parā | dinadvaye tadvyāptitadvyāptyoḥ pūrvadine ca jyeṣṭhāmūlayutāyāṃ parā | dinadvaye'pi niṣiddhayogarahitāyāstad vyāptau tadvyāptau tadekadeśavyāptau vā pūrvā | yadā tu pūrvadine rohiṇavyāpinyapi niṣiddhanakṣatrayoginī paradine tādṛśanakṣatrayogarahitāpi rohiṇasaṃsparśinī tadā'pi paraiva | kanyārke'gastyodaye ca nedaṃ karttavyam | śukle'gastyodaye bhāvini sannihita tatpūrvakṛṣṇāṣṭamyāmetat kāryam | aniṣiddhakālasya sarvathaivālābhe tu niṣiddhakāle'pi vratānukalpo'nuṣṭheyaḥ | bhādrasyādhikamāsatve male evaitat kāryam | idaṃ ca vrataṃ strīṇāṃ nityam | ⁠1agastyodayaśca siṃhasaṃkrāntidinamārabhyaikaviṃśatime trayoviṃśatimevāṃśe bhavati | arghyaścāgastyodayānantaraṃ kanyāsaṃkrāntiparyantaṃ deyaḥ | iyameva jyeṣṭhāpūjane jyeṣṭhānakṣatrayogavaśena pūrvā parā vā grāhyā | dinadvaye'pi nakṣatrayoge paradine madhyāhnādūrdhvaṃ nakṣatrasattve parā'nyathā rātrāvapi nakṣatrayoge pūrvaiva | dinadvaye'pi jyeṣṭhānakṣatrayogābhāve tu parā | yattu jyeṣṭhānakṣatramātrāmapekṣaṃ tithivratād bhinnaṃ dākṣiṇātyeṣu prasiddham | jyeṣṭhāpūjārūpaṃ vrataṃ, tadyasyāṃ tithau jyeṣṭhānakṣatraṃ bhavati tasyāṃ tithau karttavyam | khaṇḍatve sūryāstamayavyāpī grāhyam | dinadvaye sattve tadabhāve vā pūrvā eva | paradina evāstasambandhe tu param | kālatattvavivecanakārāstvaṣṭamībhānuvārayugandhratarayugvā jyeṣṭhānakṣatraṃ grāhyam | anyatarayogasyāpyabhāve madhyāhnādūrdhvamanuvarttamānaṃ grāhyamityāhuḥ | nirṇītapūjādināt pūrvadine'nurādhāyāmāvāhanamuttaradine mūle ca visarjanam