Nirnayakautuka 3.p2

3.p2

candragrastāste uttaradine saṃdhyāhomādau na doṣaḥ | grasyamāne snānam | graste homaḥ surārcanam | mucyamāne dānam | mukte snānam | grahaṇe snānamādyantayoḥ sacailamamantrakaṃ sarveṣāmāvaśyakam | muktisnānameva sacailamiti madanaratne | grahaṇakāle tataḥ prāgvā pakvamannaṃ tat paścādapi varjayet | grahaṇe 1śrāddhamapi nityaṃ kāmyaṃ ca | taccāmena hemnā vā | candragrahaṇanimittakaṃ snānadānaśrāddhādi rātrāvapi bhavati | grahaṇanimittaśrāddhenaivāmāsaṃkrāntyādi nimittakānāṃ siddhiḥ | etaccāpiṇḍakaṃ 2tripiṇḍakaṃ vā kāryam | grahaṇe kiñciddānaṃ nityaṃ kāmyaṃ ca | nityatvādeva malamāse'pi bhavati | grahaṇakāle jananamaraṇanimittāśaucasattve'pi snānaśrāddhadānādimantradīkṣāpuraścaraṇādi sarvaṃ smārttakarma ca bhavatyeva | rajasvalā'pi pātrāntaritatoyena snāyāt | grahaṇe sati tannimittāśaucaṃ sarveṣāṃ jāyate'taḥ snānācchrāddhādyadhikāraḥ | grahaṇadine parānnaṃ na bhoktavyam | grahaṇāntaritasya pūrvasaṃkalpitadravyasya dvaiguṇyaṃ bhavatīti śiṣṭāḥ | atra mūlaṃ cintyamiti nirṇayasindhau | grahaṇakāle bhojane prājāpatyam | vedhakāle grastāstottaraniṣiddhakāle ca bhojane trirātropavāsaḥ | strībālavṛddhādīnāṃ tattadarddham | samastamaṅgalakāryeṣu sampūrṇagrāse trayodaśīto dinanavakaṃ varjyamiti kecit | candragrahe dvādaśyādi tṛtīyāntaṃ, sūryagrahe ekādaśyādi caturthyantaṃ varjyamityapare | khaṇḍagrahe tūbhayataścaturdaśyādidinatrayam | tayorgrastāste pūrvaṃ dinatrayam | grastodaye paścāttanaṃ dinatrayam | grahaṇaṃ janmacaturthāṣṭamadvādaśarāśiṣu niṣiddham | sūryagrahaṇe tadādisaptadinaparyantaṃ vā rāmagopālādyāgamadīkṣā kāryā, na candragrahaṇe | grahaṇe rahasyapuraścaraṇaṃ kāryam | tacca grastodaye grastāste ca na bhavati | grahaṇadine pratyābdika satẏāmena hemnā vā tat kāryam