Nirnayasindhu 14.2

14.2

" iti kātyāyanokteśca || atra mūlaṃ
cintyam
pakṣaśrāddhe nandādiṣu na piṇḍaniṣedhaḥ
tathā pakṣaśrāddhakaraṇepi na nandādiṣu piṇḍaniṣedha ityāha parāśaramādhavīye kārṣṇājiniḥ"nabhasyasyāpare pakṣe śrāddhaṃ kāryyaṃ dinedine | naiva nandādivarjyaḥ syānnaiva nindyā caturdaśī" iti || atra śrāddhamityekavacanāt 'dinedine' iti vīpsāvaśācca somayāgavadekasyābhyāse naikaprayogaparamidam | ataḥ - ' pratipatprabhṛtiṣvekāṃ varjayitvā caturdaśīm ' iti
yājñavalkīyaṃ prayogabhedaparaṃ na tu pañcamyādipakṣaviṣayam | 'pratipatprabhṛtiṣu' iti viśiṣyokteḥ | nirṇayadīpe pṛthvīcandrodaye madanapārijāte caivam
anyakṛṣṇapakṣaparaṃ yājñavalkīyam | etatparatvenaiva nindyā caturdaśī iti virodhāditi
gauḍāḥ || tanna || 'śrāddhaṃ śastrahatasyaiva caturdaśyāṃ mahālaye' iti virodhāt | tattvaṃ tu“tithinakṣatravārādiniṣedho ya udāhṛtaḥ | sa śrāddhe tannimitte syānnānuṣaṅgakṛte hyasau"
iti divodāsīye vṛddhagārgyoktestannimitte pakṣāṃtare ca jñeyaḥ || sakṛnmahālaye tu vacanānniṣedhaḥ | anyatra kopi na niṣedhaḥ | kārṣṇājinismṛteriti || ato nandādau sapiṇḍaśrāddhe putravatopyadhikāraḥ | atrirapi- "mahālaye kṣayāhe ca darśa putrasya janmani
tīrthepi nirvapetpiṇḍānnavivāhādikeṣvapi ||” pūrvoktanandāniṣedhastu mṛtāhātikrame sakṛnmahālaye paurṇamāsyādimṛtaśrāddhe tannimitte ca jñeyaḥ || yattu smṛtyarthasāre-"vivāhavratacūḍāsu varṣamardhaṃ tadardhakam | piṇḍadānaṃ mṛdā snānaṃ na kuryāttilatarpaṇam " iti || tasyātrāpavādo divodāsīye bṛhaspatiḥ- "tīrthe saṃvatsare prete pitṛyāge mahālaye | piṇḍadānaṃ
prakurvīta yugādibharaṇīmakhe || mahālaye gayāśrāddhe mātāpitroḥ kṣaye'hani | kṛtodvāhopi
kurvīta piṇḍanirvapaṇaṃ sadā"