Nirnayasindhu 24.5

24.5

iti
govardhanapūjananirṇayaḥ
atra govardhanapūjādi coktaṃ hemādrau nirṇayāmṛte ca skāṃde-“prātargovardhanaṃ pūjya dyūtaṃ
cāpi samācaret | bhūṣaṇīyāstathā gāvaḥ pūjyāścāvāhadohanāḥ ||” govardhanaśca gomayena
kāryyaścitreṇa vā | mantrastu-“govardhanadharādhāra gokulatrāṇakāraṇa | bahubāhukṛtacchāya
gavāṃ koṭiprado bhava ||” gomantrastu-“lakṣmīryā lokapālānāṃ dhenurūpeṇa saṃsthitā | ghṛtaṃ
vahati yajñārthe mama pāpaṃ vyapohatu” tatraiva skāṃde-“tato'parāhnasamaye pūrvasyāṃ diśi
bhārata | mārgapālīṃ prabadhnīyāttuṃge staṃbhetha pādape || kuśakāśamayīṃ divyāṃ laṃbakairbahubhirmune | darśayitvā gajānaśvānsāyāmasyāstale nayet || kṛtahome dvijendraistu badhnīyānmārgapālikām | namaskāraṃ tataḥ kuryānmantreṇānena suvrata || mārgapāli namaste'stu sarvalokasukhaprade | vidheyaiḥ putradārādyaiḥ punarehi vratasya me || nīrājanañca tatraiva kāryyaṃ rāṣṭrajayapradam
rājāno rājaputrāśca brāhmaṇāḥ śūdrajātayaḥ | mārgapālīṃ samullaṅghya nīrujaḥ syuḥ sukhānvitāḥ”