Nirnayasindhu 32.6

32.6

" aparārke brāhme"kanyāścatasro rākādyā vātaghnī caiva pañcamī | krīḍanārthā ca bālānāṃ ṣaṣṭhī ca
śiśurakṣiṇī || khaṅge tu pūjanīyā vai vaiśyairvrātyairdvijātibhiḥ ||" rākānumatiḥ
sinīvālīkuhūriti catasraḥ kanyā ityarthaḥ
dattakagrahaṇavidhiḥ
atha dattakaparigrahavidhiḥ || pārijāte śaunakaḥ- "aputro mṛtaputro vā putrārthaṃ samupoṣya ca | vāsasī kuṇḍale dattvā uṣṇīṣaṃ cāṃgulīyakam || bandhūnnannena saṃbhojya
brāhmaṇāṃśca viśeṣataḥ | anvādhānādi yattatra kṛtvājyotpavanāntakam || dātuḥ samakṣaṃ
gatvā tu putraṃ dehīti yācayet | dāne samartho dātāsmai ye yajñeneti pañcabhiḥ
devasyatveti mantreṇa hastābhyāṃ parigṛhya ca | aṅgādaṅgetyṛcaṃ japtvā āghrāya śiśumūrdhani || gṛhamadhye tamādhāya caruṃ hutvā vidhānataḥ | yastvāhudetyṛcā caiva tubhyamagna ṛcaikayā || somo'dadadityetābhiḥ pratyṛcaṃ pañcabhistathā | sviṣṭakṛdādihomaṃ ca
kṛtvā śeṣaṃ samāpayet"