Nirnayasindhu 33.2-3

33.2-3

atha dolārohaḥ
pārijāte bṛhaspatiḥ- "dolārohastu kartavyo daśame dvādaśepi vā | ṣoḍaśe divase vāpi
dvāviṃśe divasopi vā ||" jyotirnibandhe- "karatraye vaiṣṇavarevatīṣu ditikṣaye vāśvinarkadhruveṣu | kuryācchiśūnāṃ nṛpateśca tadvadāndolanaṃ vai sukhino bhavanti ||" tatraiva- "āndolāśayaneḥ puṃso dvādaśo divasaḥ śubhaḥ | trayodaśastu kanyāyā na nakṣatravicāraṇā || anyasmin divase cetsyāttiryagāsye praśasyate ||"
atha dugdhapānam
nṛsiṃhaḥ- "ekatriṃśaddine caiva payaḥ śaṃkhena pāyayet | annaprāśananakṣatre divasodayarātriṣu ||"
atha karṇavedhaḥ
madanaratne vasiṣṭhaśrīdharau- "māse ṣaṣṭhe saptame vāṣṭame vā vedhyā karṇau dvādaśe ṣoḍaśehni
madhyenāhnaḥ pūrvabhāge na rātrau nakṣatraṃ dve dve tithī varjayitvā ||" atra janmamāso varjyaḥ
jyotirnibandhe gargaḥ- "māse ṣaṣṭhe saptame vāpyaṣṭame māsi vatsare | karṇavedhaṃ praśaṃsanti
puṣṭyāyuḥśrīvivṛddhaye ||" madanaratne- "prathame saptame māsi aṣṭame daśametha vā | dvādaśe
ca tathā kuryātkarṇavedhaṃ śubhāvaham ||" hemādrau vyāsaḥ- "kārtike pauṣamāse vā caitre vā
phālgunepi vā | karṇavedhaṃ praśaṃsanti śuklapakṣe śubhe dine ||" śrīdharaḥ- "harihayakaracitrāsaumyapauṣṇottāryāditivasuṣu ghaṭālīsiṃhavarjye sulagne | śaśigurubudhakāvyānāṃ dine
parvariktārahitatithiśu śuddhe naidhane karṇavedhaḥ ||" madanaratne bṛhaspatiḥ- "dvitīyā daśamī
ṣaṣṭhī saptamī ca trayodaśī || dvādaśī pañcamī śastā tṛtīyā karṇavedhane || sauvarṇī rājaputrasya rājatī vipravaiśyayoḥ | śūdrasya cāyasī sūcī madhyamāṣṭāṅgulātmikā