Nirnayasindhu 34.2-6

34.2-6

ṭoḍarānande vasiṣṭhaḥ-"naimittikamanadhyāyaṃ kṛṣṇe ca pratipaddinam | mekhalābandhane śastaṃ
caule vedavrateṣvapi || praśastā pratipatkṛṣṇe na pūrvā parasaṃyutā || " etadatītakālasyārtasya vaṭorupanayanaviṣayam | " praśastā pratipatkṛṣṇe kadācicchubhage vidhau | candre balayute lagnavarṣāṇāmapi laṃghane " iti vyāsokterityāhuḥ || evaṃ saptamyapi | tasyā galagrahatvokteḥ || bṛhaspatiḥ 'śuklapakṣaḥ śubhaḥ proktaḥ kṛṣṇaścāntyatrikaṃ vinā || ' tathā'mithune saṃsthite bhānau jyeṣṭhamāso na doṣakṛt || ' madanaratne nāradaḥ-"vinartunā vasantena kṛṣṇapakṣe galagrahe | aparāhne copanotaḥ punaḥ saṃskāramarhati || " aparāhnastridhā vibhaktadinatṛtīyāṃśa ityuktaṃ tatraiva | vasante galagraho na doṣāyetyarthaḥ
nāradaḥ-"kṛṣṇapakṣe caturthī ca saptamyādi dinatrayam | trayodaśīcatuṣkaṃ ca aṣṭāvete
galagrahāḥ " || vāsiṣṭhaḥ- "pāpāṃśakagate candre arinīcasthitepi ca| anadhyāye copanotaḥ
punaḥ saṃskāramarhati || anadhyāyasya pūrvedyustasya caivāparehani | vratabandhaṃ visargañca vidyārambhaṃ na kārayet "