Nirnayasindhu 58.2-3

58.2-3

”
nigamaḥ-“triḥpibaṃ tvindriyakṣīṇaṃ śvetaṃ vṛddhamajāpatim | vārdhrīṇasaṃ tu taṃ prāhuryājñikāḥ
śrāddhakarmaṇi ||” vārdhrīṇaso-jaracchāga iti medhātithiḥ || kātyāyanaḥ-‘chāgo'srameṣānālabhya’ śeṣāṇi krītvā labdhvā vā svayaṃvṛtānāṃ vāhṛtya pacet || kaurme-“krītvā
labdhvā svayaṃ vātha mṛtānāhṛtya vā dvijaḥ | dadyācchrāddhe prayatnena tadasyākṣayyamucyate ||”
dattasya māṃsasyābhakṣaṇe doṣamāha manuḥ-“niyuktasya yathānyāyaṃ yo māṃsaṃ nātti mānavaḥ
sa pretya paśutāṃ yāti saṃbhavānekaviṃśatim ||” atra bahuṣu vacaneṣu śrāddhe māṃsamadhunoḥ
prāśastyokteḥ || vinā māṃsena yacchrāddhaṃ kṛtamapyakṛtaṃ bhavet’ iti hemādrau devalokteḥ
“yacchrāddhaṃ madhunā hīnaṃ tadrasaiḥ sakalairapi || miṣṭānnairapi saṃyuktaṃ pitṝṇāṃ naiva tṛptaye
aṇumātramapi śrāddhe yadi na syācca mākṣikam | nāmāpi kīrttanīyaṃ syāt pitṝṇāṃ prītaye
tataḥ ||2||” iti hemādrau brāhmokteśca māṃsamadhunoḥ śrāddhe niyatatvaṃ gamyate || gauḍanibandhe mātsyasūkte-“ madhvabhāve guḍo deyaḥ kṣīrasya ca tathā dadhi | na labhyate ghṛtaṃ
yatra kuryāt ghṛtavatīrjapam || ”
śrāddhakalikāyāṃ nāgarakhaṇḍe-“kathaṃcidyadi viprebhyo na dattaṃ bhojane madhu | piṇḍāttu
naiva dātavyāḥ kadācinmadhunā vinā ||” bṛhatparāśarastu māṃsaṃ niṣedhati-“yastu prāṇivadhaṃ
kṛtvā māṃsaistarpayate pitṝn | sa vidvāṃścandanaṃ dagdhvā kuryādaṅgāravikrayam || kṣiptvā kūpe
yathā kaṃcidbāla ādātumicchati | patatyajñānataḥ sopi māṃsena śrāddhakṛttathā