Nirnayasindhu 64.3

64.3

tatra viprālābhe-“bhojayedathavāpyekaṃ brāhmaṇaṃ paṅktipāvanam | daive kṛtvā tu naivedyaṃ paścāttasya tu nirvapet” iti śaṃkhoktereko vipraḥ pūrvamuktaḥ || viprābhāve darbhabaṭuḥ || “nidhāya
vā darbhabaṭūnāsaneṣu samāhitaḥ || preṣānupreṣasaṃyuktaṃ vidhānaṃ pratipādayet” iti devalokteḥ || aśaktāvāmaśrāddham || “āpadyanagnau tīrthe ca pravāse putrajanmani | āmaśrāddhaṃ prakurvīta bhāryārajasi saṃkrame” iti kātyāyanokteḥ
pṛthvīcandrodaye jamadagniḥ-“yāvatsyānnāgnisaṃyukta utsannāgnirathāpi vā | āmaśrāddhaṃ
tadā kuryāddhaste'gnaukaraṇaṃ bhavet ||” kaurme-“anagniradhano vāpi tathaiva vyasanānvitaḥ
āmaśrāddhaṃ dvijaḥ kuryādvṛṣalastu sadaiva hi” āhitāgnau pravāsasthe tatpatnī gṛhe darśaṃ
ṛtvigādinā kārayet || “amāvāsyādi niyataṃ proṣite dharmacāriṇī | patyau tu kārayennityamanyenāpyṛtvigādinā” iti laghuhārītokteriti pṛthvīcandrodayaḥ || ādipadamābdikādisarvapārvaṇaparamiti śūlapāṇiḥ || sumantuḥ-“pākābhāve'dhikāraḥ syādviprādīnāṃ narādhipa | apatnīnāṃ mahābāho videśagamanādibhiḥ || sadā caiva tu śūdrāṇāmāmaśrāddhaṃ vidurbudhāḥ ||”
pracetāḥ-“strīśūdraḥ svapacaścaiva jātakarmaṇi cāpyatha | āmaśrāddhaṃ sadā kuryādvidhinā pārvaṇena tu ||” svayaṃ pacatīti svapacaḥ apatnīkaḥ | viṣṇūśanasau-“ātmano deśakālābhyāṃ
viplave samupasthite | āpadyanagnau tīrthe ca pravāse patnyasaṃbhave || candrasūryagrahe caiva dadyādāmaṃ viśeṣataḥ | na pakvaṃ bhojayedvidvān sacchūdropi kadācana || bhojayan pratyavāyī
syānna ca tasya phalaṃ labhet